Shillong, Risaw, 21: U Myntri ka Sorkar Jylla u Timothy D. Shira ha ka sngi Baar ula kynnoh ba u MP ka seng Congress na Tura u Saleng A. Sangma mynba u dang long u MLA um ju kren eiei wat shi kyntien ruh ïa ka jingdawa ïa ka rel hynrei mynta u ïaiban kajuh shi kajuh ka jingdawa ïa kaba ladep dawa da kiwei kiwei ki MLA ban pynïasoh ïa ka lynti rel sha kiwei kiwei ki bynta jong ka rilum Garo.
U Shira u la ong ba ha ki samoi ba u dang long u MLA, u Sangma um ju kren eiei ïa ka jingpynïasoh lynti rel.
“Kata (ka jingdawa jong u Sangma) ka dei kaba shu kam. Ki la don kiwei ruh ki MLA kiba la dawa ban pynïasoh ïa ka lynti Rel, kata ka dei tang ka jingpynbud, ym don jingmut eiei na lade. Haba u dang long MLA, ha ka jingshisha u la dei ban dawa ïa ka jingpynïasoh lynti rel. Lada u kwah ban leh bha ïa ki paidbah, hynrei ba u long marwei, u shu sngap jar,” la ong u Myntri ha ka jingïakren bad ki lad pathai khubor.
Katkum ka jingong jong u, ki MLA khamtam na ka NPP ki la dawa ban pynïasoh ïa ka lynti rel sha Baghmara, South Garo Hills district.
Haba kylli, u Shira u la pynkynmaw ïa ki jingtrei shitom jong ki paidbah ban ïada ïa ka khyndew ka shyiap bad ïa ka jingrung kyrthep ki mynder.
U la banjur ba ki paidbah ha ka thaiñ jong u, ki long kiba peitngor bha, kiba pynthikna ruh ba ki briew kiba nabar kin ym ïohlad ban buhai shnong ne ban thied jaka khlem da ïoh jingbit. Hynrei u la ong ba ki bar jylla kiba don hapoh ka thaiñ ki dei tang kiba leh ïa kam khaii pateng.
