U President barim u hap ban ai jingkheiñ ïa ka pisa ba la lum 13 snem, jied nongïalam bathymmai ka NRAO&DA
Jar jar kyllut ki nongïalam wat hadien ka jingdawa
Nongpoh, Nailur 15: Hadien ka jingkuman bad ka jingkyllut jong ki nongïalam ka Nongpoh Region Auto Owners & Drivers Association (NRAO&DA) wat hadien ka jingdawa ba dei ban pynlong jingïalang bad ban ai jingkheiñ ïaka pisa bala lum mynta la kumba 13 snem, ki nongñiah bad ki trai auto kiba ju kamai haka thaiñ Nongpoh kila pynlong syndon da ka jingïalang paidbah haka sngi Saitjaiñ ha Iewmawlong Nongpoh bad ban jied syndon da ki nongïalam ba thymmai naka bynta ka samoi treikam jong u snem 2024-27.
Ki nongïalam ba thymmai jong ka NRAO&DA kiba la shah jied ban bah ïaka lyngkor bad ka eh ka shong ki para nongñiah auto ki kynthup ïa u Bah Banasar Lyngdoh Nonglait kum u President, Vice President Bah Tony Shylla, Secretary Bah Donbok Nongkhlaw, Asst Secretary bah Bakmenlang Suting, Finance Secretary bah Cornelius Mawrie, Asst. Finance bah Arbistar Thankhiew, Publicity Secretary bah Forster Lyngdoh, Bankitboklang Nongshli Sports Secretary lem bad kiwei kiwei bad la wan ruh ban pynskhem ïaki da u MLA ka Nongpoh u Bah Mayral Born Syiem haka jingdonlang u Rubul Ali Traffic Incharge, Bah Plielad Tiewsoh Founder Member jong ka Association lem bad kiwei kiwei.
Ha shuwa ban pynlong ïaka jingjied ïaki nongkitkam ba thymmai jong ka Association naka liang ki trai bad ki nongñiah auto naki 9 tylli ki Unit kila pynlong ka jingïatai kaba jur halor ka jingtreikam jong ki nongïalam barim naduh u President u Bah Marcus Marten u ba la shu sngap man man bad leh kyllut wat hadien ka jingdawa jong ki para nongñiah auto ban pynlong jingïalang bad ai ka jingpynshai halor ka rukom treikam mynta da ki phew tylli ki snem, namar kum ki nongñiah auto ki hap ban ai 10 tyngka kawei ka auto man ka sngi.
Dei halor katei ka nongrim kum ka kynhun ki trai bad ki nongñiah auto kim banse ban shim ïaka rai ban jied noh da ki nongïalam ba thymmai bala wan ruh ban shim bynta da ki spah ngut ki nongñiah auto bad ki trai auto.
Shuh shuh ha katei ka jingïalang la shim ruh ïaka rai ba u President ba rim u Bah Marcus Marten u hap ban pynshai ïaki jingkheiñ jingdiah bad ka rukom treikam hakhmat ki nongkitkam ba thymmai jong ka Association bad lada um lah naka liang katei ka kynhun ba thymmai kan sa shong pyrkhat ban shim pat da kiwei ki lad ki lynti.