Nongstoiñ, Ïaiong 22: Ka Ashirvad Pipe Pvt. Ltd. ha ka sngi thohdieng jong ka taiew ka la pynlong ïa ka prokram pyni nongmuna ïa ki jingmyntoi bad ki rukom pyndonkam ïa ki HDPE pipe (Pipe Jri), kiba long kiba kham rit dor bad kham neh slem ban ïa u pipe nar ne GI pipe.
Ïa katei ka jingpyni nongmuna la pynlong ha phyllaw ka ophis u SE, PHE Western Circle, ha kaba la ïadonlang ruh u Bikram Sharma, Associate Partner jong ka Sanico Marketing Corporation, Guwahati, u Bhrigu Pant, Senior Engineer, Ashirvad Pipe Pvt. Ltd, u SDO ka PHE Nongstoiñ Division u Bah W.Syiemlieh, ki ophisar abad staff ka PHE, ki contractor bad kiwei kiwei.
Haba maitphang halor ki jingmyntoi da kaba pyndonkam ïa u HDPE pipe, na ka liang u Bikram Sharma, Associate Partner jong ka Sanico Marketing Corporation Guwahati, u la ong ba katkum ka jingwad bniah la lap ba u HDPE pipe u long u ba khambha ban pyndonkam ha kaba tan um ban ïa u GI pipe.
U la ong ba ka jingïapher hangne ka long ba u pipe nar u kem sarang kloi bad u lah ban neh tang kumba hapoh 20 snem. Hynrei une u pipe jri u neh palat ïa ka 50 snem bad u lait ruh na ka jingkem sarang, ha kaba ka um kaba ring ha ïing ha sem ruh kan long kaba khuid.
U ong ba nalor kane, une u pipe jri u kham rit dor shibun ban ïa u pipe nar bad u lait na ka jinglang sohpailen hapoh bad u kham suk ban pyndonkam bad kham stet ban pyndait. U la ïathuh ruh ba ha ki ri ba la kham shai kum ha ki ri Europe, kiba bun kim pyndonkam shuh ïa u pipe nar, hynrei ki la pyndonkam beit da kine ki pipe jri, namar ka ïarap ïa ka um ba kan tuid bha bad lait ruh na ka jingjakhlia.
Katba na ka liang u Bhrigu Pant, Senior Engineer, Ashirvad Pipe Pvt. Ltd, u la ai ka jingbatai ba bniah halor kumno ban pyndonkam ne ban pyndait ïa une u pipe lyngba ki lai tylli ki bynta kita ki kynthup ïa ka Butt fusion joining, Electro fusion joint and Mechanical joiñt lane Compression fittings. Na ka liang ki contractor and nongtrei ka tnad PHE ki la ïoh ban ïatai bad kylli shibun ki jingkylli, ha kaba la ïoh ban pynshai pat da kitei hi ki ophisar.
