U Myntri Rangbah ka Assam u ïatrei lang bad ka Meghalaya ban tohkit bad pynshitom ïa kiba donkti: CM

Shillong, Naiwieng 23 : U Myntri Rangbah ka jylla u Conrad K Sangma mynta ka sngi ha ka jingleit sngewlem sha ki long ïing kiba la ïakynduh ïa ka jingjia ba sngewsih na ka jingshah siat iap pathar ha ki pulit Assam ha ka 22.11.2022 u la pynsngeh ïa ka kali jongu haba u la ïohi ïa ki nongïalam seng bhalang ba ki pynpaw ka jingpyrshah jur halor kane ka jingjia.
Ha kane ka jingïakren bad ki nongïalam seng bhalang ula kular ba ka sorkar kan shim khia ïa kane ka kam khnang ba ka hok bad jingshisha kin paw. U la ïathuh ba u Myntri Rangbah ka Assam u Himanta Biswa Sarma ruh u ïatrei lang bad ka sorkar Meghalaya halor kane ka jingshah siat iap ki san ngut ki mynsiem briew ha ki pulit Assam. Na ka liang u Himanta ruh u la mynjur ban aiti tohkit sha ka NIA ne CBI halor kane ka jingjia, ong u myntri rangbah.
U Conrad u la ïathuh ba ka sorkar Assam ka ïatrei lang bad ka sorkar Meghalaya ha ki liang baroh. Na ka liang ka sorkar Assam kala dep sospon ïa u OC bad u Ophisar jongka tnad Forest jongka kiba donkti ha ka jingjia. Nalor kata ïa u SP ka West Karbi Anglong ruh la dep pynkynriah kam hynnin hi ka sngi.
U la ïathuh ha ki seng bhalang ba lashai ka sngi ma u bad u Himanta Biswa Sarma lem bad ki myntri jongu kin leit ban ïa kynduh ïa u Amit Shah Myntri Kam Pohïing ka sorkar pdeng ban ïakren halor kane ka jingjia ha Mukroh.
Na ka liang ka JSU ka la ai ïa ka memorandum sha u Myntri Rangbah bad dawa ban buh ïa ka Police Out Post ha Mukroh. U la ong ba dang shen ka sorkar ka la rai ban buh ïaka Out Post ha Barato hynrei halor kane ka jingdawa ka sorkar kan sa bishar bniah biang bad ka lah ban pynkynriah noh sha Mukroh.
U la kular ba ïa baroh ki jingeh ba la pynpaw da ki seng bhalang bad kumjuh ruh da ki paid katei ka thaiñ un ra rah hakhmat u Myntri Kam Pohïing ka ri ha ka jingïakynduh lashai ka sngi.