U Mebansan bad James Anderson ki ar ngut ki samla ki ban leit sha ka 48th National Aquatic C’ship

Mawkyrwat, Naitung 11: Ka long kaei kaei ka jingsngewsarong na ka bynta ka dong ka thaiñ Mawkyrwat bad ïa ka South West Khasi Hills District baroh kawei ha kaba mynta ka kynti na ka liang ka South West Khasi Hills District Swimming Association ka la ïoh ban sei biang ïa ki khun samla ki ban sa mih khmat ïa ka Jylla Meghalaya lem bad kiwei de para nongïajngi-um ha ka 48th National Aquatic Championship Junior Category.
Lah ban kdew ba ki ar ngut ki khun samla kiba dei napoh ka South West Khasi Hills District ki long u Mebansan Sangma bad u James Anderson Kharlyngdoh ha kaba kine kin sa mih ha ka 13 tarik u Naitung, 2022 ban leit ïakhun ha ka 48th National Aquatic Championship Junior Category ka ban long ha Biju Patniak Swimming Pool-cum-Sports Complex Kalinga Stadium, Bhubaneswar, Odisha.
Ha kaba ïa dei bad kane ka bynta, na ka liang ka South West Khasi Hills District Swimming Association lyngba u President, bah H.S. Diengdoh, MCS, bad kum u SDO ba la shongthait jong ka Ranikor Civil Sub Division u la ïoh ban khot bad pynlong ka jingïalang ban ai mynsiem na ka bynta jong u Mebansan Sangma bad u James Anderson Kharlyngdoh kiba dei ki ar ngut ki khun samla kiba la shah jied napoh ka South West Khasi Hills District.
U bah Diengdoh ha ka jingkren jong u u la ong ba watla ka South West Khasi Hills District kam pat don ïa ka jaka ba paka ban kilanmet hynrei haba phai pat ïa ka jingmih ki samla ha kane ka kam ïalehkai jngi-um ki long kiba bun bad ki la nang mih ruh shibun haba ïa nujor bad ki snem kiba la leit. “Ngi don tang ka Photum-new hynrei kine ki khun samla da ka mynsiem jong ka jingtreishitom bad ka jingaiti lut ha kane ka kam mynta ki la nang kiew na kawei ka sngi sha kawei pat”, ong u bah Diengdoh.
Ha kajuh ka por u la pynpaw ruh ka jingaikhublei na ka bynta ki samla kiba la mihkhmat ïa ka distrik ha kane ka Meghalaya Games 2022 kaba dang shu dep bad kiba la wanrah ruh ïa ki khusnam lyngba ka jingjop jong ki bad kumjuh ruh ïa ki ar ngut ki khun samla kiba la leit ban ïashimbynta ha ka Khelo India kaba la long ha Haryana, “hooid kim shym la jop hynrei ka jingleit ïashimbynta jong ki ka ai mynsiem ba kin nangtrei shitom nangne shakhmat”, u la ong. Namarkata, u la kyntu ba kim dei ban kut tang ban ïoh ïa ki khusnam hynrei ki dei ban don ka mynsiem ban im ha ka lynti jong ka jingbha bad kiar na ki kam sniew kiba long ka jingpyntroiñ ïa ki jingthmu ba ki ki don. U la ong ruh ba haba ki don ka jingthmu ban kiew ha ki kam ïalehkai ki dei ruh ban long borabor kiba biang por ha kiei kiei baroh.
Ha kane ka sngi u bah H.S. Diengdoh kum ka dak jong ka jingkitbok kitrwiang na ka bynta ki ar ngut ki khun samla u la ïoh ban ai ka kti jong ka jingkhublei ryngkat ka jingïarap kaba long tang kum ka dak kaba rit eh.