Jowai, Nailur 13: Ki nongkyrshan jong u ma Dawan Lyngdoh u ban ïakhun ïa ka Election MLA 2023 na ka 1-Nartiang Assemble Constituency, kila pyntip paidbah ba une u kyrtong un ïeng ban ïakhun kum u kyrtong MLA da ka mon jong u hi khlem da don kino kino kiba pynbor na kiwei pat.
Ïa kane kitei ki nongkyrshan ba hajan jong u ma Dawan Lyngdoh naduh kiba haïing ha sem, ki kur ki jait jong u, ki khun samla bad ki nongïalam shnong kila mih ban pynshai paidbah hadien ba la don ka khubor hamsaia na ki don ki kynhun party kiba la kam ba ïa u ma Dawan Lyngdoh la pynïeng Election da ki katto katne.
Hynrei ïa kane la kyntaid mardor ha ka jingïakren bad ki lad pathai khubor mynta ka sngi ha ïing u ma Dawan Lyngdoh ha Nangdong-A West Jaiñtia Hills District.
Ha kane ka sngi kitei ki nongkyrshan jong u ma Dawan Lyngdoh kiba kynthup naduh u ma Lambor Lyngdoh u rangbah jong ka kur, ula ong kane ka kam Saiñ Hima Sima jong u ma Dawan Lyngdoh wat na ka liang ka kur ka jait bad ka ïing ka sem, kila mynjur lang ïa kane ka jingthmu jong ban ïakhun laidluid ïa ka Election 2023.
‘Bunsien ki paidbah kila shah pynthame ha ki riew shim kabu jong ki party’ da ka u ong ba ïa u ma Lyngdoh la pynïeng kyrtong da kiwei ki Candidate, hynrei kam long shisha kumta namar ïa kane ka kam ki la shim da kawei ka jingmut jong ka ïing ka sem hi baroh kawei”.
‘Ngin ïeng ban ïakhun ïa kane ka Election kam dei da ka jingpynbeit ïa ki paidbah da ka pisa, ngin ïaleh da kaba khuid ba suba khlem da don ka jingar tatien, ne ka jingshah kynthoh bad ngin khot sngewbha ïa ki paidbah ka 1-Nartiang Constituency da ka mon laidluid ban kin ai ka jingkyrshan ba pura ïa u ma Dawan Lyndon ha kane ka kynti, la bynrap shuh shuh u ma Lambor.
U Waheh Shnong ka Namdong-A ma Arki Sumer ula pynsngew hadien ba u ma Dawan ula dep ban aiti ïa ka shithi sha ka shnong ban ïakhun ïa kane ka Election 2023, na ka liang ka shnong kala pdiang sngewbha ïa kane ka shithi da kaba kitbok kitrwaing ïa u ba un ïaid shakhmat ïa kane ka kam. Ula kyntu ïa ki paidbah ba kim dei ban shah ïalam bakla ïa ki khubor hamsaia, namar ïa kane ula leh da ka mon sngewbha jong u.
U Shining Star Thubru Secretary Shnong ula ong baka shnong ka ai ka jingkyrshah pura ïa u ma Dawan Lyngdoh naduh ba ula pynbna sha ka shnong ban ïakhun ïa kane ka Election 2023 bad u buh ka jingkyntu ïa ki paidbha ka thiañ ba kin ai ka jingkyrshan ïa une u kyrtong uba mih ban ïakhun MLA na ka shnong Namdong.
U samla Rishot Thubru President Youth Wing UDP Nartiang Circle haka jingkren ula pynsngew ba u ma Dawan ula mih shakhmat ban ïakhun ïa kane ka Election ka long da ka jingthmu jong u ban wanrah ki jingkylla bad ban pynbha pynmiat ïaka shnong ka thaw hi baroh kawei, da kaba u kyntu ïa ki paidbah ba kim dei ban shah ïalam bakla ha ki khubor hamasaia kiba ym lah ban pdiang da leilei ruh.
Uwei na ki riew rangbah ka thaiñ u ma Constan Thubru Adviser Synjuk Waheh Shnong jong ki 30 shnong Mynsngat Khanduli Area ula ong ba ka shnong kala dep ban pynïeng ïa u ma Dawan Lyngdoh kum u MDC ha kane ka kynti bad mynta ki don ka jingthmu ïa u ban ïakhun ïa kane ka MLA ha u snem 2023.
