Jowai, Naitung 18: Ka seng jong ki trai bad nongñiah trok na Ri-Lum Jaiñtia kaba la tip kum ka ‘Jaiñtia Hills Truck Owner Association’ (JHTOA) kaba ju peit ïaki eh ka shon jong ki, mynta ka sngi ka la ïoh ban jied ïa u ma Biangshwa Shylla kum u President ba thymmai.
Ïa kane ka jingjied President la leh hadien ba u President ba rim jong ka seng u ma Nidamon Chullet uba la shah rai pynrem da kaba shah set patok shi jingim da ka ïingbishar badon burom ka District Sessions Court, Jowai ha ka 19 tarik u Kyllalyngkot 2022.
Baroh kiba poi sha kane ka jingjied President kila don haduh 195 vote na ka liang u ma Biangshwa Shylla ula shah jied kum u President ba thymmai da kaba ïoh haduh 108 vote, u ma Balen Thubru ula ïoh 63 vote, u ma Kyrshan Dkhar ula ïoh 20 vote bad 4 tylli ki vote kiba long invalid.
Kum ban shu hynkynmaw ba haka 11 tarik u Naitung ka jingthmu ban jied President thymmai kala pulom noh naka daw jong ka jingkulmar bad ka Election Committee, kumta la rai biang ban jied mynta ka sngi 18 tarik u Naitung bad kala long ka ba ïaidbeit ïaidryntih hapoh ka jingpynïaid ka Hynñiewtrep Integrated Territorial Organisation (HITO) bad ka Dorbar Shnong Phramer haka jingïadon u President rangbah ka HITO u samla Donbok Dkhar kumjuh ki dkhot ka seng na East bad West Jaiñtia Hills.
Hadien kane ka jingjop jong u ma Biangshwa Shylla kum u President ba thymmai ka JHTOA, na ka liang ka Seng ka ai ka jingkit bok kit rwiang ïa u ma Shylla ba un lah ban pynïaid shakhmat ïa ki kam ba bha jong kane ka seng ki trai bad nongñiah trok hapoh ka Ri-Lum Jaiñtia.
