Nongstoiñ, Ïaïong 01 : Ka West Khasi Hills ka dei ka district kaba kynrei bha ki jaka kiba itynnad kum ki lum ki kshaid bad kiwei kiwei kum ka dewlynnong Nongkhnum, lum Mawthadraishan, Mawphanlur bad kiwei kiwei kiba ka sorkar ka la ithuh ïa kitei ki jaka kum ki jaka jngoh kai pyrthei bad ki paitbah na kylleng ki jaka man la u snem ki tuid sha kitei ki jaka ban leit kai sngewbha.
Nalor kitei ki jaka dang don shibun kiwei pat ki jaka kiba kiba itynnad bad kiba don la ki khana pateng kat kum ki kyrteng ba la jer kyrteng ïa ki hynrei haduh mynta ym pat don ba tip ne ithuh ïa kitei ki jaka. Katto katne ki kyrteng bad ki jaka ki bym pat paw hangno hang no ruh ki dei kum u Mawleng uba don shaphang shatei na ka shnong Nongdaju kaba don harud ka surok National Highway 44(E) kumba 15 kilomitar shuwa ban poi sha Shallang, u lum Mawjut uba don shaphang shatei na ka shnong Nonglang West Khasi hills hajan ka shnong Kyndongei bad Mawkapiah.
Ka Kshaid Thupthup kaba don ha ka wah Rwiang kumba 3kilomitar na ka jingkieng kaba don ha syndah ka Shakambari Ferro Alloys Limited ,ka kshaid Patharsynke kaba don shaphang mihngi na ka shnong Nonglang kaba jngai kumba 7 kilomitar bad kiwei kiwei ki kshaid kiba jrong kiba don ha ka wah Blei ha ki thaiñ Nongmawlong bad kiwei kiwei .
U lum Mawjut utei u lum u dei uba kynjang bha bad uba long thik kumm ka jin kulai. Ha baroh sawdong ki dap tang ki krem ki kroh bad ki mawramsong kiba heh bad kiba ïar bha. Ha kliar eh ka don ka madan phlang kaba itynnad hynrei ha kine ki snem ka la kylla long ‘law bniap ha baroh sawdong .Nalor kata ha marshiteng u don u mawsiang uba don ar syrtap bad ba la pynïakhlad ha ki lai bynta bad ka jingkynjang na trai haduh ha jrong jong utei u maw kan ym duna ïa ka 200 phut .
Kat kum ki khana pateng la ong ba la jer kyrteng Mawjut namar ba hyndai kulong la don kawei ka briew kaba don arngut ki khun shynrang bad ka leit rep shyrti ha katei ka jaka bad ha kawei ka sngi haba la poi ha katei ka jaka ka la iehnoh ïa kitei ki arngut ki khun ha jrong utei u maw bad ka la leit trei noh sha lyngkha.
La ong ruh ba katba kitei shipara ki dang ïaleh kai utei u maw u la ang bad sdang ban nguid ïa uba kham rit.uba kham heh u la ïohi bad u la pyrta ïa ka kmie ba kan wan ïarap hynrei utei u maw u la nguid sa ia u. Ki khana pateng ki ong ruh ba kitei ki khynnah ki la lyniar bad pyrta ïa ka kmie ba kam wan ïarap hynrei haba ka kmie ka la poi ka kmie baroh kam lah leh ei ei shuh namar u maw u la dep nguid bad ki khlieh ki paw shabar satang malu mala .La ong ruh ba ka kmie ka la ïaleh ban sei hynrei kam lah kumta ka la shim da ka wait bad ka la bat triang na u sñiuh jong ki hynrei kam lah kumta ka la ot ïa u sñiuh jong ki bad ka la leit phai noh sha ïng ryngkat ki sñiuh jong kitei ki khun.
Ki khana pateng ki ïathuh ruh ba kata ka longkmie ka la ïam paitdohnud na ka bynta ki khun jong ka bad ka la shna uwei u shang uba rit bad ka la la leit sha trai utei u maw bad ka la kiew biang hajrong utei u maw bad ka la rung shapoh na kawei ka thliew bad ka la jah rngai syndon.Haduh mynta katei ka thliew ka dang don bad lada pynhap da ki maw kiba heh bad sngap lah ban ïoh sngew ïa ka jingsawa bad suki suki ka nang jah ka nangjah haduh ba ym lah shuh ban ïoh sngew.
