Nongstoiñ K’lyngkot 12: U Laha u dei u mar rep uba kham phylla bha bad uba ïaid ïew bha ong u bah Swingly Samakha sordar barim ka shnong Langpih.
U bah Samakha haba ïakren bad u nongthoh khubor u la ong ba u laha u dei u marrep uba la ïalam da ki tymmen hyndai bad ka rukom rep ïa u kam dei satia ha ka khyndew hynrei la rep ïa u Laha ha jrong ki dieng hynrtei ki don tang katto katne ki jait dieng kiba long ban rep ïa utei u jait mar rep.
Nalor kata u la ong ba utei u jait marrep u dei uba la pynmih da ki kynja khñiang kiba rit bha kiba don ha ki tnad jong ki dieng ba la ju tip kum ki dieng jri Laha, nangta kiwei pat ki jait dieng jri kiba rit bad ki don ruh ki jait dieng kiba lada ot ïa ka snep ki mih ka kynja um kaba lieh kum ka dud bad kaba long thit.
Haba kylli pat ha kano ka rukom ki rep ïa utei u jait marrep u bah Samakha u la ong ba ha ki bnai Risaw haduh Naiwieng haba ki khñiang ki la sop ïa ki tnad kiba rit ki nongrep ki leit pom ïa kitei ki tnad bad ki sa thad ryngkhiang nangta ki sa khlong ïa u bad hapoh jong utei uba sop sawdong ïa u tnad dieng ki don ki pylleng bad ïa uba ki mut ban buh symbai ki song ha ki kynja sla dieng ne jaiñ jot bad ki da pynpei thliew baroh sawdong bad leit teh biang ha ki tnad dieng.
Ynda la poi u bnai Jymmang ki khñiang kiba don ha kitei ki jingsong ki mih noh bad ki kiew ha ki tnad ha baroh kawei ka dieng bad haba ki sdang ban sop ki pynmih ïa ka kynja sboh bad kha pylleng artad bad suki suki ki sdang ban shroiñ bad ki kylla eh.
Utei u rangbah u la ïathuh ruh ba ka dor ïew jong u Laha ka poi haduh sanspah tyngka shi kilo bad ha ka thaiñ Langpih ki nongshong shnong ha Nongmawleiñ ki dei kiba smat bha ban rep Laha bad lada dei ka snem ba ki khñiang ki kha bha lei lei ki don ki nongrep kiba ioh ar haduh lai kwintal shi aïom bad tang na kaba rep Laha ki ïoh ban thaw ïa ki ïng ki sem bad kyrshan skul ruh ïa ki khun ki kti jong ki.
U la ong ruh ba ha ki por mynhsuwa ki riew tymmen ki pyndon kam ruh ïa u Laha kum ka dawai da kaba shet ban dih haba kdiah shyieng na kaba ur ne hap bad ka ïarap bad pynkoit.
