U la pyndep ïa ka kamram ha sla pyrthei, hapdeng ki ummat kthang la tep don burom ïa u Dr.Ricky A.J.Syngkon

Nongpoh, Rymphang 21: Kum u nongïalam haka kam saiñ pyrthei bad kum u shakri jong u Blei u Dr Ricky AJ Syngkon u la pyndep ïala ka kamram ha sla pyrthei, ka dei ka kyntien kaba mih na kiba bun ki paidbah ba bun ba lang bad kiba ïeid ïa une rangbah u ba la khlad kyndit haka janmiet jong ka 19 tarik Rymphang.
Mynta ka sngi kaba dei ka sngi ontep ïa u Dr Ricky AJ Syngkon hapdeng ka jingsngewsih kthang bad ryngkat ki jingjaw ummat da ki hajar ngut ki paidbah na kylleng ka ri Khasi bad Jaiñtia kila tuid sha madan Nongsder ban ai khublei khatduh ïa une u rangbah hapdeng ka jingbynnud bad ka jingsahnud naduh ka iing ka sem, ki paralok parajor bad ki baieid bathoiñ baroh.
Ha shwa ka prokram paidbah, la pynlong ïa ka jinglehniam hapoh ka iingsah jong u Dr. Ricky haka shnong Nongsder. Hadien kata, la rah ïa ka met sha madan ICAR, ha kaba la pynlong ïa ka jinglehniam paidbah kaba khatduh. Nangta pat, la pynkit ïa ka met sha u lum jingtep jong ka Balang Presbyterian Sumer Umbang ban tep don burom ïa u.
Ïaka jinglehniam ba khatduh la ïalam da ki Pastor ryngkat ki Tymmen Basan bad ki Rangbah Balang jong ka Balang Presbyterian Sumer, hapdeng ka jingïashim bynta jong ki paidbah byllien kiba la iam kthang mar sien poi ka met u Dr Ricky.
Nalor ki paidbah kiba la poi da ki phew hajar ngut, la sakhi lang ruh da ki heh sorkar jylla bad ki nongmihkhmat paidbah, kiba kynthup ïa u Ma Sniawbhalang Dhar, Symbud Myntri Rangbah ka jylla, u Dr. Mukul Sangma, nongïalam ka liang pyrshah, u Bah Ardent Miller Basaiawmoit, MLA Nongkrem bad President Rangbah ka VPP, lem bad ki MLA, ki MDC bad kiwei kiwei ki riew pawkhmat.
Kiba bun naki nongkren ha kane ka sngi ki pynpaw ka jingsngew bynnud halor ka jingkhlad kyndit une u rangbah u ba dei ruh u nongïalam ka jylla kum u MP u ba la pyrshang ban kren shibun ki mat bad don ka jingangnud ban wanrah ka jingkylla haka jylla bad ka jingduh noh ïa une u rangbah ka dei ka jingduhnong kaba khraw ym tang ïaka iing ka sem, ka shnong ka thaw hynrei ïaka jylla hi baroh kawei.