U la ong ïa nga to ngin ïaklet ïa ka jingïapher saiñ pyrthei bad ngin ïatreilang na bynta ka jylla : Sniawbha

Shillong, Rymphang 21 : U Symbud Myntri Rangbah ka jylla u Ma Sniawbhalang Dhar haba kren na ka liang ka Sorkar mynta ka sngi ha ka jingleh burom ba khatduh ïa u MP ka Shillong Parliamentary Constituency shwa ka jingleit ontep don burom ïa u, u la ïathuh ba ula ïa kynduh ïa u Dr Ricky AJ Syngkon ha Kad Liengsuin hashwa ban leit sha Delhi bad ha katei ka jingïakynduh bad ïakren u Dr Ricky u la ong ïa u ban ïaklet noh ïa ka jingïapher ha ka saiñ pyrthei bad ban ïatrei lang na ka bynta ka jylla bad ka jaidbynriew hynrei hadien tang katto katne por ba la ïa kynduh u la khlad kyndit noh na sla kane ka pyrthei.
U ma Sniawbha u la ong ka jingkhlad noh jongu Dr Ricky ka long ka jingduh kaba khraw ym tang ïa ka ïing ka seng, ïa ka party hynrei khamtam eh ïa ka jylla, ka jaidbynriew bad ka ri hi baroh kawei namar u dei u Nongïalam uba ïeng shisha na ka bynta ka jylla.
“ Nga sngewsih ktang ïa kane ka jingkhlad ba kyndit une u MP ba don burom jong ngi u Dr Ricky Syngkon uba dang 54 snem ka rta. Ka jingkhlad noh jongu ka long ka jingduh kaba khraw ym tang ïa ka ïing ka seng, ïa ka jylla bad ïa ka ri hi baroh kawei. U dei u briew uba stad bad shephang bha uba pyndonkam ïa ka jingnang jingstad jongu ym na ka bynta ka jingmyntoi shimet hynrei ban shakri ïa ka imlang ka sahlang khamtam eh ban trei na ka bynta ban kyntiew ïa ka jylla” ong u ma Sniawbha.
U la ong ba kum u MP ha i por ba lyngkot ruh u la pyndonkam hok ia ka jingnang jingstad jongu ban wanrah ka jingïalong kawei bad u ïai kren na ka bynta ka roi ka par jongka jylla bad jong ka thaiñ.
U la ïai kren ruh halor u pud u sam namar ka jingshah ktah jong ki nongrep ka West Jaintia Hills bad dawa ruh ba ka sorkar kan siew bai lut ksan ïa ki namar ka jingshna ïa ka surok Shillong Dawki kaba la ktah ïa kiba bun ki jaka rep jaka riang jongki nongrep.
U la ong shuh shuh “ ïa kane ka jinglong jong une u nongïalam yn ïai kynmaw da ki paidbah ka jylla bad ka thaiñ hi baroh kawei da ka mynsiem jong ka jingburom, jingieit bad jingsngewnguh. Ym tang katta hynrei yn ïai kynmaw ruh ïa ka jingtrei jongu na ka bynta ka jylla pateng la pateng”.
U la ong “ Ka jingduwai jong nga kan long bad ka ïing ka sem jong une u nongïalam ba U Blei un dang aibor , pyntngen bad wanrah ka jingsuk ïa ki bad khatduh u la ong nga duwai ruh ba ka mynsiem jong une u nongïalam kan shong jahthait junom bad la U Kynrad.