U la dep phla lut ba u dei tang ma u uba pyniap ïa ki 2 ngut ki khun da kaba siah na ryndang

Shillong, Jylliew 6 : Kat kum ka khubor pulit ba la ïoh la ïathuh ba u Jeffarson Jana u la phla lut nadong shadong ba u dei tang ma u uba pyniap ïa ki arngut ki khun ba dang rit iwei ba saw snem bad iwei iba ar snem ka rta. Une u briew haduh mynta ka sngi u dang don ha byndi ki pulit bad lashai ka sngi ki pulit kin tian bishar biang ïa u hakhmat ka ïing bishar.
Haba ïakren bad u heh pulit u bym kwah ban pynpaw kyrteng u la ong “ Ngi la thikna ba une u briew u leh hi ïa kane ka kam namar u la dep phla lut nadong shadong bad u dei ma u ruh uba leit ïalam ïa ka jaka ba u la buhrieh ïa ka tari ba u siah pdot ïa ki khun. Nalor kata u la dep phla ruh ba ka daw ka dei namar ba ka kurim jongu kaba dei ka kmie jong kine ki khun kam treh shuh ban ïasah ryngkat bad u hadien ba ula mih na ka jaka shah sumar ( Rehabilitation Centre) dang shen. Kumta ngin dang bishar la ngi dang donkam ne em ban pan bor na ka ïing bishar ban buh ïa u ha byndi ki pulit ban dang tohkit ne ka la biang ruh namar la dep thikna ba u dei ma u uba leh ïa ka kam. Kaba sah ka long sa tang ban charge sheet bad pynngat ïa u ha ki kyndon aiñ kiba tyngeh khnang ba ka ïing bishar kan rai bad ai ka jingpynsaja kaba tyngeh ïa u”.
Une u kpa runar u la leh mynleh kumba ieit ïa ki khun da kaba u la leit shaw ïa ki na ïing kaba ha Nonglum Nongrah ha ka janmiet 30 tarik Jymmang 2022 da ka jingong ban leit pynthied jingbam ïa ki. Hooid u la ïalam thied jingbam ïa ki na kawei ka dukan shnong bad ha ka por ba u thied jingbam ha katei ka dukan la ïathuh ba u la kum pynhap ïa ka tari bad dei ka khun ba saw snem kaba la pyntip ïa u ba u la pynhap ïa ka tari. Hadien ba ula dep pynthied jingbam u la ïalam ïa ki na katei ka dukan bad la suba ba u ialam beit beit ia ki sha ka lawbniap ha Wahktieh, Nongrah bad leh ïa kane ka kam ban pyniap dusmon ïa ki khun. Hadien kane ula jah rngai namar u la phet rieh. haba ki khun ki khlem poi ïing shuh ynda la miet ruh kiba haïing ki la leit ban pyntip sha ki bor pulit halor ka jingjah ki khun.
Dei ha ka step 31 tarik ba kiba haïing bad ka shnong ki la ïaleit wad bad ki sa lap ïa kine ki arngut shipara ba ki la shah pyniap ha katei ka lawbniah ha Wahktieh, Nongrah. Ki pulit ki la thwet ïa utei u kpa runar hynrei kim lap namar u la phet rieh bad dei tad ha ka por miet ba u la leit phai sha la ïing kmie ba kiba haïing ki sa pyntip sha ki pulit bad ki pulit ki sa wan ban kem ïa u. Ha ka sngi kaba bud kata ha ka Sngi Balang 1 tarik Jylliew une u briew u la ïalam ïaki pulit sha katei ka jaka ba u pyniap ïa ki khun bad pyni ïa ka jaka ba u buhrieh ïaka tari hadien ba ula dep pyniap ïa ki da kaba shu siah na pdot.
Ban shupynkynmaw ba ïa ka jingtohkit halor kane ka jingpyniap dusmon une u kpa ïa kine ki arngut ki khun rit la shimti da ka Special Investigation Team (SIT) ba la khlieh da u DSP (Crime) bad peit nadong shadong ( supervise) da u SP City bah Vivek Syiem. Ki pulit ki la pynngat ïa u Jefferson ha ka kyndon ain 364 bad 302 IPC bad nalor kane ki dang don sa kiwei ki kyndon aiñ ba ki pulit ki pynngat ïa u.
Ka ïing bishar ka la ai bor ïaki pulit ban tohkit ïa u haduh 7 sngi lynter bad lashai ka dei ka sngi ba kut bad ki pulit kin ïalam ban tian bishar biang ïa u. Ha ka jingtohkit ki pulit ïa une u kpa runar u la phla ba ula pynhiar kput ha ki khun namar ba ka kurim jongu kam treh shuh ban pdiang ïa u ba un wan phai bad ïasah lang biang bad ka namar u dei u briew uba shu dih kyiad lynter bad uba pyndik bha ïa ka ha ki por shwa ban leit buh ïa u sha rehabilitation Centre.
Lada ki pulit kim pan por shuh na ka ïing bishar ban set ïa u ha byndi jongki, ka ïing bishar kan sa rai ban set phatok ïa u katba ka jingbishar pat kan dang ïai bteng tad haduh ba ka ïing bishar kan ai rai pynrem da kiei ki jingpynshitom kiba un ngat.