U hap pynbeit ïa ki jingbakla, lymda kumta u hap mih noh napoh ka jylla: Dawa ka VPP ïa u VC NEHU

Shillong, Risaw, 03: Ka Voice of People Party (VPP) ha ka sngi Palei ka la ai por khatduh ïa u Vice Chancellor jong ka skulbah North Eastern Hill University (NEHU) u Prof PS Shukla ba un pynbeit ïa ki jingleh pyrshah ïa ki trai ri trai muluk kane ka jylla Meghalaya.
Ha ka jingïakren bad ki lad pathai khubor hadien ka jingïakynduh ïa u Vice Chancellor, u President ka VPP u Bah Ardent Miller Basaïawmoit u la ong, ‘ka jingïakynduh ïa u VC ka long halor kiba bun ki kynrum ki kynram, ka jingshah leh beiñ jong ki briew jong ngi, ki jingeh jong ki samla pule bad ki nonghikai ki ïakynduh.”
“Ha ka jingïakynduh, ngi la ong ïa u VC, lada ka jingdon jong me ka skulbah ka long ka jingduhnong ïa ngi, kan bha ba men mih noh na kane ka jaka jong ngi, namar ngin ym shah ïano ïano ban wan hangne ban pynmyntoi ïa kiwei pat ki bym dei hok ban ïoh jingmyntoi bad ki ban pynduhnong ïa ka jaidbynriew ka jong ngi,” la pynpaw u Bah Ardent.
“Kata ka dei ka kyrwoh ba ngi wan ai ha u bad ngi ai ruh ïa u khyndiat por ba un pynbeit ïa kine kiei kiei ki jingleh kiba long pyrshah ïa ngi ki trai muluk ki trai jaka ne kiba long Anti-Local,” u la bynrap.
Haba kylli, u President ka VPP ula ong, “ngin ap ïa ka jubah jong u. Ki bun ki mat kiba wan (ban pynsngew ha u VC) hangne. Ki jingleh donbor jong une u VC haba u shim ïa kano kano ka rai um khlem da burom ïa ka NEHU Act, ka jingthung ïa u Proffesor ba la shongthait hapoh ha NEHU Tura Campus. Kine ki donpor sa tang lai snem, kaei ka jingnoh synñiang jong ki sha ka pule ka dangle. Kim lah ban long kum ki Supervisor ne ki Guide na ka bynta ki samla pule, kan long ka jingduhnong kaba khraw.”
Da kaba ai nuksa ba u VC u la thung ïa u Colonel Omkar Singh u shipai ba la shongthait kum u Comptroller of Examination, u la ong, “kaei kaba ki samla pule ki la mad ha kine ki khyndiat bnai? Namarba um (shipai ba la shongthait) don ïa ka jingtbit ban pynïaid kam ha ophis ki (NEHU) la kyntiew ïa u mynta kum u Registrar kaba khlem don ïa kano kano ka lynti. Kine ki dei tang ki katto katne namarba ki la bun ki jingeh ba une (u VC) u la pynmih bad mynta ka shong ha u kumno ban pynbeit ïa kita ki jingeh.”
“Ngi la aipor ïa u ba un pynbeit ïa kine ki jingleh donbor bad ki jingleh bakla jong u bad un hap pyntip ïa ngi ha ki khyndiat sngi bad lada kam long kumta ngin ym shong kli kti. U hap ban mih noh syndon na kane ka jylla bad kam don jingmut ïa u ban shong hangne,” la bynrap u Bah Ardent.
Na ka liang jong u VC ka NEHU la ong ba ki nongïalam jong ka VPP ba kynthup ïa u MP ka Shillong u Dr. Ricky AJ Syngkon uba dei ruh u nonghikai jong ka University ki la ïakynduh ïa u ban ïakren halor kiba bun ki mat jong ka skulbah.
Katkum ka jingong jong u, ka shithi kaba wan na u MP ka kdew ba u hap ban shimkhia na ka bynta ka bha ka miat jong ki trai ri trai muluk.
“Hynrei u MP ha ka shithi u la kdew shai ba kam dei ban long shabar jong ka rul. Nga la pyrshang ban treikam hapoh ki rul bad nga la wanrah ruh ïa ka bynta ban pynbeit ïa ka jingtreikam hapoh ka skulbah,” la ong u Prof Shukla.
U Prof Shukla shuh shuh u la kam ba ka skulbah ka la pyntreikam ïa kiba bun ki kyndon jong ka UGC na ka bynta Academic Excellence.
Haba kylli halor ka jingbuh jingkylli jong ka VPP ha kaba ïadei bad ka jingthungkam ïa u shipai ba la shonthait u bym don jingtip eiei kum u nongpynïaid eksamin, u VC ka NEHU u la ïathuh ba ki don hynñiew ngut ki dkhot jong ka Selection Committee ba la khlieh hi da ma u kaba ju mynjur ïa kiba bun ki jingthungkam hapoh ka skulbah.
U la ong, ka Selection Committee ka kynthup ïa ki Expert nabar ka jylla nalor uwei u dkhot ba la thung da ka President jong ka ri India bad u Registrar na kawei pat ka skulbah. “Ngi la khot ïa ka interview hadien ba la bishar bniah ïa ki aplikeshon. Ngi la thung ïa u shipai ba la shongthait kum u Registrar jong ka skulbah hadien ba la bud ryntih ïa ki kyndon,” u la ong.
U Prof. Shukla u la ong ba u la ruh ban pyni sakhi da ki kot ki sla lada ki paidbah kim ngeit ïa kaei kaba u la ïathuh.
“Ka jingjied kam da shong eh tang ha u Vice Chancellor.. Haoid, u Vice Chancellor u dei u chairman jong ka committee. Ngan hap ban mynjur ïa ka jingthungkam ha kano kano ka post katkum ka nongrim ba la ai jingmut da ka Selection Committee,” la bynrap u Prof. Shukla.