U Fr. Balawan wat la u dei u Missionary na Ri Sepngi ki kam ba bha kiba u leh ki kren briew ha them Ri Bhoi

Nongpoh, Nailur 25: U Fr. Michael Balawan wat la u la khlad noh na kane ka pyrthei la bun bun phew snem kum u Missionary ba khraw ka Balang Katholik hapoh ka jylla Meghalaya, hynrei ki kam kiba bha kiba u la leh ki dang im bad ki dang neh haduh kine ki sngi na ka daw ba kum u Missionary u la noh synñiang shibun ban beh krad ïa ka jingdum bad ban wan rah ïa ka jingshai na ka bynta ki paid Khasi jongngi hapoh kane ka bri u Hynñiewtrep.“Kum ba la ioh lum jingtip, u Fr. Michael Balawan, u dei u Missionary ka Balang Katholik uba la wan na ka ri Sepngi na ka ri France bad ka jingwan jong u sha kane ka rilum Khasi ka long ban wan rah jingshai na ka bynta ban kyntiew ïa ka jingnag jingstad nalor ka kam kaba u shakri na ka bynta ki paid riewngeit ka Balang Katholik halor ka jingim ba kynja mynsiem.“La ioh jingtip ruh ba u Fr. Balawan u la poi sha kane ka them Ri Bhoi ha ki snem 1960 ei ei ban shakri ïa ka them Ri Bhoi hi baroh kawei la ka long ha ka jingim ba kynja mynsiem ne ban kyntiew ïa ka pule ka puthi, hynrei hapdeng shibun ki kam kiba khraw kiba u la leh ban beh ïa ka jingdum bad ban wan rah ïa ka jingshai, u Fr. Balawan u la khlad noh na kane ka pyrthei ha ka ha 11 tarik u Risaw 1989 ba ka kyrteng bad ka nam jong u ka dang im dang neh haduh kine ki sngi ba la dap 33 snem naduh ba u la khlad noh na kane ka pyrthei.“Lah ban khot ruh ïa u Fr. Michael Balawan ba u dei u Apostol ka Them Ri Bhoi bad kum u Missionary na Ri France u la shakri kylleng ki jaka jong ka them Ri Bhoi ha kaba hikai na ka bynta ka jingim ba kynja mynsiem bad ruh ban pynphriang ïa ka jingnang jingstad hapoh ka them Ri Bhoi bad wat ha ka jylla Meghalaya hi baroh kawei.“Kine ki kam ba ba bha ba la leh da une u Missionary, ka la paw pyrthei bluit ka dei hidien ba ka St. Michael’s Higher Secondary School, Umsning kan rakhe ïa ka Diamond Jubilee ka jingïaid lynti kaba la dap 60 snem ba u Fr. Michael Balawan u dei uwei na u Missionary uba la seng ïa kane ka skul na ka bynta ban kyntiew ia ka pule ka puthi hapoh ka them Ri Bhoi.“Na ka liang u Fr. Pius Shadap, Parish Priest ka Umsning Parish, haba kren ha ka jingplie ïa ka tamasa pynirong (Autumn Fiesta) ba la pynlong da ka St. Michael’s Higher Secondary School Past Pupil Association shi bynta ban kyrshan ia ka jingrakhe ia ka Diamon Jubilee kane ka skul, u la pynpaw halor ki kam ba radbah ba la noh synñiang da u Fr. Michael Balawan kum u nongseng ïa ka skul St. Michael ha Umsning kaba kum u Missionary na ri Sepngi u la wan ban aiti met bad mynsiem ban kyntiew ia ka dong bad ka thain Ri Bhoi bad wat ha ka jylla Meghalaya hi baroh kawei.“Kaei kaba la pynpaw da u Fr. Pius Shadap, kane ka skul ka la dap 60 snem ka jingïaid lynti ban shakri ha kaba kyntiew ïa ka pule ka puthi bad dei une u Phadar uba la seng ïa kane ka skul kaba dang ieng kynjreng haduh kine ki sngi ba ka la pynprhiang ïa ka jingnang jingstad hapoh ka them Ri Bhoi.“U la rong ruh ïa kane ka skul la seng ha u snem 1961 ha kaba ha katei ka por ka Umsning bad ka them Ri Bhoi hi baroh kawei ka dang dei tang ka lawbah lawsan bad bun ki briew ki dang sahdien shisha ha ka jingnang jingstad, hynrei ka jingwan une u Missionary na ka ri France u la wan rah ïa ka jingshai ba kane ka skul haduh kine ki sngi ka la shakri ban dang kyntiew shuh shuh ïa ka jingnang jingstad hapoh ka them Ri Bhoi.“Shuh shuh, kaei kaba u Fr. Pius Shadap u la shim ïa ka jingim bad ka jingïaid lynti jong u Fr. Balawan, ka dei kaba u la iehnoh shadien ïa ka ing ka sem na ri Sepngi ban wan rah jingshai sha kane ka jylla baieit jongngi bad kum ki nongshong shnong bad ki nongïalam jongngi ha kane ka juk ba mynta ngi dei ban bud ïa ka nuksa jong une u Missionary uba len lade ïa ka jingim ban biang kiwei bad ym ban biang ia lade bad la jin ba um dei uba kwah ban iarap ïa kiwei un nym dei ban wan naduh ka ri sepngi na ka ri France ban wan shakri sha kane ka dong bad ka thaiñ baieit jongngi kaba ngi la dang kiew ha baroh ki liang katba dang mih ki sngi na ka jingdon kum kine ki riewshlur bad ki riew len lade.