U EE um donbor ban pynthymmai ïa ka dor jong ka Tender: Bah Ransom

Shillong, Naitung, 08: U Executive Engineer PWD (Building) ba la shongthait dang shen u Bah Ransom Sutnga ha ka sngi Thohdieng u la kyntait war ïa ka jingkynnoh jong ka Hynñiewtrep Youths Council (HYC) Central Executive Council ba ka ophis jong u EE PWD (B) ka la pynkiew be-aiñ ïa ka dor jong ka Tender ban shna ïa ka Assembly ba thymmai ha Mawdiangdiang, New Shillong.
Dang shen ka seng ka la ujor da ka jingthoh ha u Lamphang jong ka Ïingdorbar Thawaiñ ka Jylla u Bah Metbah Lyngdoh uba dei ruh u Chairman jong ka High Power Committee ka Meghalaya Legislative Assembly da kaba dawa ban un tuklar halor ka jingkynnoh ba ka ophis jong u EE PWD (B) ka la pynkiew dor jong ka Tender ban shna ïa ka Assembly ba thymmai ha Mawdiangdiang, New Shillong khlem ka jingtip bad ka jingmynjur jong ka HPC.
Ha ka jingïakren bad ki lad pathai khubor ha ka sngi Thohdieng u Bah Ransom Sutnga u la ong, “ka ophis u Executive Engineer PWD (B) kam dei ka bor bad kam lah hi ruh ban pynkylla ïa ka Tender Cost namarba ka Financial Power jong u EE ka dei tang T. 6 lak katkum ka Financial Rules.”
“Na ka bynta ka Estimate ban pynthymmai ïa ka dor jong ka projek ka don da ka Official bad ka Technical Procedures,” u la ong.
“Halor kane ka Official bad Technical Procedures ka ophis jong u EE ka pynkhreh ïa ka Revise Estimate bad ka phah pat sha ka ophis jong u Chief Engineer PWD (B) ban mynjur ïa ka Revise Estimate bad nangto la phah pat sha ka User Department. Ka User Department ka phah pat sha ka Parliametary Affair jong ka Assembly bad ka ka Parliametary Affair hadien ba la ïoh jingmynjur ka shong ïa ka Departmental Sanctioning Committee. Ha ka Departmental Sanctioning Committee ki don ki dkhot jong ka Parliamentary Affairs, ka tnat PWD (B), na ka Meghalaya Legislative Assembly Secretariat bad na ka Finance Deparment ka Sorkar Jylla. Hadien ba la shong ïa ka Departmental Committee ka ai ïa ka Adminitive Approval bad ka Parliamentary Affairs ka phah ïa kane sha ka Planning Department bad ka buh hakhmat eh ïa kane ka projek bad ynda ladep na ka Planning Department ka leit sa sha ka Finance Department ban ïoh ïa ka jingmang pisa,” la pynshai u Bah Sutnga.
“Hadien ba ladep mynjur ïa ka jingmang pisa jong ka Revise Estimate, ka Finance Department ka phah sha ka Planning Department bad kumjuh ruh ka phah ban leh ïa kaba donkam bad ha kajuh ka por ka ai ïa ka kopi sha u Chief Engineer PWD (B) na ka bynta ban leh ïa kaba donkam. Dei hadien ba la ïoh ïa kane, ka Ophis jong u Executive Engineer PWD (B) ka lah ïa kaba donkam.”
Ha kaba ïadei bad ka jingkynnoh ba la pynheh ïa ka dor khlem da ïoh ïa ka jingmynjur na ka High Power Committee, u Bah Sutnga u la ong, “ha ka jingshisha, nga kwah ban shu ïathuh halor ka jingmynjur na ka High Power Commitee, ka Ophis jong u EE kam dei ka bor ban wad ïa ka mynjur na ka HPC bad nga kwah ban batai ba katkum ka jingïohi ha ka RTI ba ki (HYC) kwah ban don da ka kynhun tohkit.”
“Na ka liang jong nga, naduh ka por ba ka la don kato ka jingjia (ka jinghap jong u Dome ka Assembly, nga kubur ba kan don ka kynhun tohkit khnang ban lap ïa ki jingshisha halor kane ka kam,” u la ong.
“Ka RTI ka long kaba donkam bad ka dei ruh ka hok jong ngi ban ïoh ïa ki jingiip hynrei ban shu batai khlem sngewthuh ïa ki jingtip ba ngi ïoh kam long kaba dei hynrei dei ban da sngewthuh bha namarba kine ki jingtip ba ngi ïoh lada ngim nang ban batai ngin ïalam bakla,” la pynpaw u Bah Sutnga.
“Ki jingkynthoh na ki riewshimet bad ha ki Social Media ba ki briew ki kynnoh ba nga peit ïa ka Inter State Bus Terminus, Mawiongrim bad ïa ka Assembly Building ngan pynshai hangne ha kaba ïadei bad ka jingpeit ïa ka ISBT kam dei na ka tnat PWD (B) bad um dei u Executive Engineer hynrei dei da kawei pat ka Division,” la pynshai shuh shuh u Bah Sutnga.
“Kat ïa ka Assembly ban peit ïa kane ka projek ka don da ka Supervising Team. Na ka liang jong ka tnat PWD (B) ngi don ka kynhun jong ki Engineer, ki Architech, ki Design Associate na Delhi kiba don la ki jong ki Architech bad ki Engineer bad ka Company kaba pyntrei ïa kane projek. Ki don ki Supervising Engineer bad ki Project Manager kiba peit ïa kane ka projek baroh shi sngi. Nga kwah ban ong, ha kaba ïadei bad ka jingpeit ïa kane ka projek ym dei eh tang ma nga hynrei ngi don da ka kynhun jong ki Engineer bad ki Architech,” la pynshai u Bah Sutnga.
Haba maham ïa kito kiba dang pynmih ïa ki jingkynnoh bad ki jingkynthoh pyrshah ïa u shimet, u Bah Sutnga u la ong, “nga kwah ban ong ba ki jingkynnoh ki long kum ka jingïalam bakla ïa kiba bun balang bad nangne shakhmat kum kine ki jingkynoh kim dei shuh ban don bad lada ki dang don ngam banse ban shim da kawei pat ka lynti jong ka aiñ.”