U drok un pyrshang lut ki lad ki lynti ban rung sha ki samla bad pynjot ïa ka jingim jong ki: Kyrmen

Shillong, Naitung 16 : U Myntri ka tnad Revenue and Disaster Management Bah Kyrmen Shylla ha ka sngi Balang u la ong ba u drok un pyrshang lut ki lad ki lynti ban ïoh rung sha ki samla bad shisien ba u la rung un pyrshang ban pynjot ïa ka jingim jong ki bad wat ïa ka kamai kajih jong ki bad ktah ruh wat ïa ka iing ka sem ruh.
Haba kren bad ki lad pathai khubor, u Bah Kyrmen u ong ruh ba u watla ka ishu kaba ïadei bad u drok kadei kaba la ktah ïa ka pyrthei baroh kawei, hynrei ha ka jylla pat ki dang don ka jingkyrmen ba kin lah ban ïakhun pyrshah tang lada baroh ki wan ha kawei ka jingmut ban ïakhun lang kawei ka bor kawei ka buit.
“Lada ïa kren shaphang u drok, kane kadei ka mat kaba jylliew bha namar kam dei satia kaba ktah tang ïa ka thain ne ka jylla hynrei ka ktah wat ïa ka ri bad ïa ka pyrthei hi baroh kawei. Ngi la ïohi ba bunsien ki samla ki la kylla long ki lanot ha ka shrip jong u lyngba ki buit ki rukom tang ban ïoh pynngop bad kjit ïa ka kamai kajih bad wat ïa ka lawei jong ki samla,” bynrap biang u Bah Kyrmen.
Shuh shuh u ong ba kane kadei ruh ka mat kaba ym donkam satia tang ban sngewkhia hynrei ka kam kaba donkam eh hakhmat ka long ban mih ryntih ban ai ka kti kamon ka kti kadiang ban ïakhun lang kumba la maitphang da ki katto katne ki Dorbar Shnong, ki Balang bad ruh ki jaka pule da kaba trei ryngkat ryngkat bad ki bor sorkar.
Da kaba kubur ba donkam ruh ïa ki khyrdop ban talasi tyngeh ïa ka jingkhaii ïa une u jingdih ba sniew, na ka liang u Myntri u ong ruh ba ka kam kaba kham kongsan ka long ruh ban pynkhlain ha la ki rukom ïakhun da kaba pyntikna ba ki khun ki kti bad ki khun samla kin lait lai-maw lai-dieng na ki shangkhawiah jong u.
Ha kawei ka liang, u Bah Kyrmen u la ong ruh ba u ju ïohi bad wat ïalade ruh u pyrshang ban pynlong ïa ki lympung ïalehkai bad kiwei kiwei ki jait prokram kiban khring ïa ki samla ba kin shim bynta la ka long ha ki shnong ki thaw lane ha ka thain. U ai nuksa ruh ba ki don bun ki nongmihkhmat kiba ju noh synniang na bynta ki tamaa ïalehkai bad kiwei kiwei ha ki constituency jong ki.
“Lyngba kine ki prokram ki samla ki lum ki lang ïa kiwei pat ki para samla bad bad ruh ïa ki heprit ha ki shnong ki thaw ne ha ka thain bad kane hi kadei shi bynta ban khring ïa ki ba kin ym ngop ha ki jingmlien kiba sniew kum u drok. Kane kadei shi bynta kaba kum ki nongmihkhmat ruh ki noh synniang na ka bynta ka bha ka miat ban lait na ki shangkhawiah jong u drok,” u la ong.
U ong ruh ba um lah khlem da ai khublei ïa ki Dorbar Shnong, ki Balang bapher bapher kumjuh ki jaka pule kiba la mih shakhmat ban tynrong lang ia kane ka lyngkor ban iakhun ryngkat ryngkat bad ki bor sorkar.
“Dei tang lyngba ka jingïatrei lang jong baroh, la ka long jong ki shnong, ki kynhun niam, ki jaka pule bad ki paidbah ba ngi lah ban ïakhun pyrshah bad pynduh jait ïa une u jingdih ba sniew na ka jylla,” u la bynrap biang.