U drok u la long kum ka jingpang khlam ha ka jylla, pynsngewthuh ka VHC Nartap sha ki samla

Nongpoh, Risaw, 12: Namar ka jingjyllei jong u drok bad ka jingkloi jong ki khun samla ban ngop bad ban kyrni ha ki kam sniew bad ki jingdih buaid bad khamtam eh ha ka shongkha khynnah, ka Village Health Council (VHC) jong ka shnong Nartap ryngkat ka jingïatreilang bad ka PHC Marngar lem bad Umsaw Nongkharai Health and Wellness Centre (H&WC) ha ka sngi Saitjaiñ ki la ai jinghikai ban pynsngewthuh halor ka jingma jong u drok bad ka shongkha khynnah, ka jingshyrkhei ka jingpang ñiangkulia bad kiwei kiwei.
Ha kane ka jingai jinghikai ba la pynlong ha ka shnong Nartap la sakhi lang da u Bah Rocky Marweiñ kum u kongsan, ryngkat ka jingdonlang jong ka Medical Officer ka Marngar PHC ka Dr J Syiem, ka Adolescence Health Counsellor jong ka Nongpoh Civil Hospital ka kong Anita Thabah, Dental Surgeon jong ka Smile Bee Dental Clinic Dr T. Suting, ki nongtrei na ki 2 tylli ki jaka sumar jong ka Sorkar, ryngkat ki kmie ki kpa, ki samla bad ki heprit na ki 4 tylli ki shnong ba kynthup ïa ka shnong Nartap, Langpadon, Sohlait Rim bad Sohlait Thymmai.
Nalor kane ka jingai jinghikai sha ki paidbah jong ki 4 tylli ki shnong ha kane ka sngi la ai ïa ka jingsumar ei sha ki paidbah ha kaba ïadei bad ka koit ka khiah jong ki bad kynthup ïa kiba pang bniat kaba long ka jingmyntoi bad ka jingkyrkhu kaba khraw ïa ki paidbah.
U Bah Rocky Marweiñ bad kiwei kiwei ki nongkren ha kane ka sngi ki la ban jur ba u drok ha kane ka jylla u la long kum ka jingpang khlam kaba la pur sted ym tang ha sor hynrei wat sha ki shnong nongkyndong, ki shnong ki bym pat poi surok bad kane ka long ka jingma kaba khraw ïa ki khun samla khamtam kito kiba luilui bad kiba la ngop ha ki jingshah pynshoi jong ki paralok.
Ki la ong ruh ba baroh ka jingsdang ïa ki kam sniew khamtam ha ka jingngop ha u drok ka dei hi na ki paralok. Ka jingshem jingeh ha iing hasem, ka jing bym don por jong ki kmie ki kpa ban syllok bad shongkai bad ki khun bad kiwei kiwei hynrei ha kum kane ka juk kaba bun tang ki jingpynshoi kiba ap thap na ka diang bad na kamon ki khun samla ki dei ban long kiba stad ban ïaid haka lynti namar wei ba ki la ngop ha u drok ka long kaba eh ban bthat ïa u kynjri.
Kumba la pynpaw ruh da ki nongtrei jong ka tnat ka koit ka khiah ha kane ka sngi ba ki nongdih drok ha ka jylla ki la don kumba 2.50 lak bad napdeng kine, la shem ba ki don 30 hajar ngut ki dei ki kynthei. Kane ka ka long ka jingpang khlam kaba shyrkhei ban pynkoit nama lehse na kiba la ngop bad kiba la im kyrni ha u drok kin nang kiew shuh shuh katba nangmih ki sngi.
Ki la ong ba kum kine ki jingpynsngewthuh ki long kiba donkam khamtam sha ki shnong nongkyndong ba kin tip ïa ka jingsdang bad ka jingshah pynshoi ha ki paralok bad ban ong em ïa u drok.
Kawei pat ka mat kaba la ban jur ha kane ka sngi ka dei ka shongkha khynnah bad ka jingpang HIV/AIDS.
Ki nongkren ki la banjur ba kum ki samla kiba dang khie dang san ki dei ban tip ïa la ka jingim bad ka lynti ban ïaid namar ka kam shongkha khynnah ka wanrah shibun ki jingeh bad ka jingduhnong ha ka jingim naduh ka jingktah ïa ka koit ka khiah bad ïa ka bor met haduh ka pule ka puthi bad kum ki briew ki dei ban kiar na ka shongkha pathar ban lait na ki jait jingpang kum ka HIV/AIDS.