U Drok, ka thma ba jar jar ïa ka Jaidbynriew lyngba ki samla: V.Swer

Nongstoiñ, Jylliew 26: Ka ophis jong ka District Medical & Health Officer DMHO West Khasi Hills District Nongstoiñ, ha ka sngi balang ka la rakhe ïa ka sngi pyrshah drok lane ‘Observation International Day Against Drug Abuse and Illicit Tracfficking’ ïa kaba la buh ïa ka phang pdeng kaba ong, ‘The Evident is clear ; invest in Prevention’.
Ha katei ka jingïalang ban rakhe ïa ka sngi pyrshah Drok u bah V.Swer MCS ADC, u la wan ban long kum u kongsan ryngkat ka jingïadonlang u Bikram D Marak Superintendent of Police jong ka West Khasi Hills District, I kong I Shadap Clinical Psychologist bad kiwei kiwei.
U kongsan haba ai jingkren u la kyntu ïa ki samla ba kin kiar na kine ki jingdih pynbuaid bapher bapher, namar ka met jong u briew ka long ka temple U Blei. U la ong ba ka jingwan lyngshop jong une u jingdih pynbuaid ba kynsha, ka dei ka jingwan hiar thma kaba na shabar ban knieh ïa ka hok jong ka jaidbynriew, da kaba rung lyngba ki khun samla ha kaba ki longïing longsem ki pait ki pra bad ki jot.
Ïa katei ka jingïalang la pynlong ha Nongstoiñ College Nongpyndeng bad la pynïaid ïa katei ka jingïalang da u Dr. R. Marweiñ DNO-DMHP.
Mairang: La rakhe ïa ka International day against drug abuse and illicit trafficking ha Eastern West Khasi Hills District. Ïa kane ka prokram la pynïaid da ka ophis jong ka District Legal Services Authority, West Khasi Hills District, Nongstoiñ ba la pynlong ha Mairang Presbyterian Science College halor ka phang, ‘The Evidence is clear Invest in Prevention’, kaba mut shwa ban jïa kiei kiei ngin hap ïada lypa.
La ïoh jingkren lyngkot na I principal jong ka Mairang Presbyterian Science College I bah R. Thangkiew bad I la ai ka jingkhublei kyrpang ïa ka District Legal Services Authority, West Khasi Hills District ba ka la wanrah ïa kum kine ki jait awareness prokram bad kaba ai jinghikai ruh ïa ki khynnah kolej ha ka jingïadei bad u drok bad ban rat diengkhong lane pynduh jait ïa u.
I kong G. L. Mawphlang (LAC) resource person ha kane ka prokram I la batai ruh shaphang ka NALSA Scheme 2015, kaba ai jingïarap ban pynlong ïa ki training lane ki prokram ban ïarap ïa kito kiba la kyrni ha u drok bad ban teh lakam ïa ki nongdih bad ki nongdie ïa une u drok, u ba long u nongpynjot ïa ka imlang ka sahlang.
I la batai ruh shaphang ka POSCO Act ba kino kino kiba ktah kti ïa ka longrynieng jong u ne ka khynnah kiba hapoh 18 snem rta, kin hap ha ka aiñ POSCO bad ba kin hap ruh ha ka jingpynshitom katkum ki kyndon aiñ bad lah ruh ban shah set patok shirta jingim.
La ïoh jing pynshai ruh na ka police department ha kaba ïadei bad ka NDPS Act na ïa bah S. K. Jana, Office in Charge Mairang PS ba ka sorkar ka la khang pyrshah ban dih ïa ki kynja dawai ne kino kino ki jingbam kiba ktah ïa ka koit ka khiah. Lada jia ba lap kin hap ha ka jing pynshitom kat kum ki kyndon aiñ.
Kiba wan sakhi ha kane ka prokram ki kynthup ïa ki NGOs bapher bapher jong ka distrik, ki nonghikai bad ki khynnah skul.
Mawshynrut: Kum shibynta ban ïasnoh kti lang bad ki paitbah ha shityllup ka pyrthei ïa ka jingrakhe ïa ka sngi ba kyrpang ban ïaleh pyrshah ïa u drok, ka District Legal Service Authority jong ka West Khasi hills ka la pynlong ïa ka jingrakhe ba kyrpang ïa katei ka sngi ha Mawshynrut.
Ïa katei ka jingrakhe la pynlong ha ka hall jong ka Mawshynrut Block Ophis ha kaba la wan ban ïashim bynta da ki longkmie, ki samla bad ki nongïalam jong ki sengbhalang.
Ïa ka programe la pynïaid da u Bah Dobok Diengdoh Legal Aid Councel ha kaba u Bah W J.Suting Sub Divisional Police Officer ka Mawshynrut Civil Sub division, u la long u kongsan u ba la ai ruh ka jingpynshai halor ka jingktah jong u drok ïa ki nongdih, ïa ka ïing ka sem bad ïa ka imlang sahlang.
Ha kajuh ka por la ïoh ïa ka jingpynshai da u Bah G.J.S Marngar Legal Aid Councel, ha kaba ïadei bad ki kyndon aiñ ba ka sorkar ka la thaw na ka bynta ban pyntreikam kumno ban ïaleh pyrshah ïa ka jingsaphriang jong u drok ha ki shnong ki thaw.
La ïoh ruh ïa ka jingpynshai na u Bah Donbok Diengdoh ïa ki bynta ba ki pulit ki dei ban leh. lada ki don ki nongkhaïi ne nongdih drok kiba dang hapoh khatphra snem.