Shillong, Nailur 13: Ka Meghalaya Editors & Publishers Association (MEPA) ka pynpaw ka jingsngewsih ka ba khraw na ka bynta ba la khlad noh u Dr. D. D. Lapang, uwei na riewsaiñ pyrthei u ba khraw tam ha jylla u ba dei ruh u Khlieh Rangbah ba nyngkong duh jong ka MEPA.
Shwa ban shim bynta kum u khlieh rangbah ka MEPA, u Dr. Lapang u la noh synñiang shikatdei eh na ka bynta ka kam pathai khubor ha ba u la shimti ban seng ïa ka kotkhubor U Peitngor ka ba la shakri ïa ka imlang sahlang bad kyntiew ïa ki rangbah bad sanmla ha ka kam thoh khubor ba dang ïai bteng haduh mynta mynne.
Ka phangma ban kyntiew shaphrang ïa ka kam thoh bad pathai khubor ka la nang bteng shuh shuh ha ba u la aiti kawei ka shlem treikam ki nongthoh khubor, ka ïing ba pura ïa ka Shillong Press Club, khnang ba ki nongthoh khubor kin ïoh la ka jaka ba paka na ka bynta ban kyntiew ïa ka pathai khubor bad ban byrngia para nongthoh khubor.
Ha ka jingïakynduh kyrkieh ki paradkhot ka MEPA ki la sien syntiew bad ñiew burom ïa u Dr D D Lapang, da ka ba kynmaw tympang ïa byllai ki kam kum u nongaibuit bad ai mynsiem ïa ki nongthoh khubor. Ka mynsiem shitrhem bad sngewrit ïohi jngai ha ka liang ban tei ïa ka imlang sahlang, ha ka ba u la synshar ïa ka jylla la sawsien kynthih kum u Myntri Rangbah ha la ki pali.
Ha ka ba phah ïa u kyrwoh sngewlem sha ka longïing longsem, ka MEPA ka pynpaw ka jingsngewnguh ïa u synñiang jong u Dr D D Lapang sha ka kam thoh khubor bad sha ka imlang sahlang baroh kawei. Ha ka kyrteng jong baroh ki dkhot ka MEPA u khlieh rangbah, Bah R Monarch Shabong u la bynñiaw ïa ka jingkhlad jong u Dr D D Lapang bad pynleit ha ka jingduwai ba ka mynsiem kan leit suk sha dwar U Blei, da ka ba ïai pyrto ïa une u rangbah.
