U Dr Dilip Kumar, u shipai Colonel uba la shongthait na ka kam u la shakri kum u Medical Officer ha PHC Saipung

Khliehriat, Rymphang 15: Kumba baroh ngi tip ba kiba bun ki shnong ha ki jaka nongkyndong ha ka jylla Meghalaya ki kynduh jingeh bha ha kiba bun ki liang ha kaba iadei bad ki lad ai jingsumar haba lap ka pang ka shitom, hynrei u wei u heh shipai, uba dei u Colonel uba la shongthait na ka kam kum u doctor uba dei peit bad sumar ïa ki khynnah, khyllung bad kumba la ong da ka tnat ka koit ka khiah ba u dei u doctor uba tbit bha , u la wan ban shimti ïa ka kam kum u doctor ha Saipung PHC, East Jaiñtia Hills District bad ai ka jingshakri ei ïa ka thaiñ lyngba katei ka PHC khlem donkam ban siew tulop (Volunteered to serve), ïa kane ka PHC la pyniaid da ka Karuna Trust.
La ong ruh utei u heh shipai u la kloi ban iehnoh ïa ka kam shakri jong u na kawei ka hospital shimet (private hospital) kaba na Hyderabad bad u la wan ban ai ka jingshakri ha ka PHC ha Saipung, u Dr Kumar, u dei uba ju trei kumu Colonel bad u doctor ba peit ïa ki khynnah, khyllung uba la ai ka jingshakri ha Sudan bad ha kiwei kiwei ki jaka ha Africa bad u long ruh u dkhot jong ka United Nations Peace keeping force.
Kumba paw ha ki social media ba la pynpaw da ka tnat ka koit ka khiah jong ka jylla Meghalaya la ong ba “ U Dr Dilip Kumar, u la kloi ban iehnoh shadien ïa ka jingim ba palei hadien ba la shongthait na ka kam bad u la shim ïa ka rai ban ai ia ka jingshakri ha ki jaka ha ki shnong kyngdong jong ka jylla kata ha at Saipung ka jaka kaba shrah bad trei shitom na ka bynta ka jingbit jingbiang ki paidbah nongshong shnong jong ka thaiñ ”
La ong ruh ba ka jingdon u Dr Kumar ha Saipung PHC ka la wanrah jingkyrmen ïa ki paidbah jong ka thaiñ Saipung bad ki shnong kiba hap hapoh ka Saipung C&RD Block bad kiba hap hapoh kane ka PHC.