U dei u ‘nongtbeh jingshai ïa ka Meghalaya’, ong u Myntri Rangbah ïa u Dr. DD Lapang
Ym tang u nongaibuit, nongai mynsiem bad nongbtin lynti
Shillong, Nailur 13 : U Myntri Rangbah ka Jylla Conrad K Sangma u la pynpaw ïa ka jingbynnud kaba khraw halor ka jingkhlad noh u Myntri Rangbah barim ka Jylla u Dr. DD Lapang ha ka 12tarik mynta u bnai ha ka rta kaba 91 snem.
“Nga khia ka mynsiem ryngkat ka jingsngewsih kthang haba nga tip ba u Myntri Rangbah barim ka Jylla, u Dr. Donwa Dethwelson Lapang u la khlad noh na kane ka pyrthei ha ka 12tarik Nailur, 2025 ha ka rta kaba 91 snem. Nga la duh ïa u nongaibuit , ai mynsiem bad nongbtin lynti ba shisha ” ong u Myntri Rangbah.
U Conrad u ong ruh, “U Dr. Lapang uba tip baroh da u‘Ma Heh’ u la long palat ban ïa u nongmihkhmat paidbah. U la dei ruh u nongtbeh jingshai na bynta ka Meghalaya bad u shakri ba shisha jong ki paidbah. Ka jingïaid lynti kaba khlem shongthait jong u la 50 snem ha ka kam shakri paidbah kala ktah ïa bun ki jingim briew. Ki polisi bad ki prokram kiba u la maitphang ki la buh dak sahkynmaw haka jingkiew jingsan jong ka jylla bad ki paidbah nongshong shnong. Hynrei nalor kata, ka jinglong jong u ka pynlong ïa baroh ba kin ieid bad sngewtynnad lut.”
Nangta u ong ruh ba u long uba donbok ban ithuh ïa u Dr. Lapang naduh ba u dang rit lyngba u kpa jong u, u (L) PA Sangma. “Khyndiat snem hadien nga ïoh ruh ïa ka lad ban treilang bad u ha Iing Dorbar Thawain ka jylla. Nga kynmaw ruh ïa kito ki sngi da ka jingsngew burom, u la de iu nongïalam uba don ka bor kaba jai jai, u briew uba phi lah ban phai sha u ban ïoh ïa ka jingai jingmut.”
Nangta u la ïathuh ba ha ka por ba u pynïasoh bad ka National People’s Party ha u snem 2018 u la bat kum u Chief Adviser jong ka sorkar haduh u snem 2024. “Kumta nga ïohi haduh katno ka jingieid jong u ban ïohi ïa ka jylla ba kan kiew arted.”
“Na bynta jongnga hi shimet u Dr. Lapang u la dei u nonghikai uba ju kloi barabor ban ai mynsiem bad pynshlur ryngkat shibun ki jingshemphang kiba u don kiba ka jingbha jong u yn ym lah ban klet noh da lei lei ruh.”
Kumta u ong ba ha kajuh ka por ba ki sngewsih lang namar ka jingduh noh ïa utei u riewkhraw, hynrei ki sngewburom ba ki ïoh pat ïa u nongïalam uba kat u nongïalam.