U dei u Nongialam ba radbah bad uba thrang ban wanrah ki jingkylla hapoh ka jylla : Ma Sniawbhalang

Shillong, Nailur 14 : U Symbud Myntri Rangbah ka jylla u Ma Sniawbhalang Dhar u la pynpaw ka jingsngewdiaw kaba khraw halor ka jingkhlad noh jong u Nongïalam ba radbah ka jylla u Dr D.D Lapang ha ka 12 tarik Nailur 2025 ha ka rta ba 96 snem.
U la ong ba kum u Nongïalam ula bat haduh san sien kum u Myntri Rangbah ka jylla bad u dei uwei na ki riewsaiñ pyrthei uba la shakri slem bha ïa ka jylla bad kane ka jingkhlad noh jongu ka la long ka jingduh kaba khraw ym tang ïa ka ïing ka sem, ïa ka Ri Bhoi District khamtam eh ïa ka jylla namar u dei u briew uba kwah barobor ban ïohi ïa ka jingkylla bad ka jingkiew jong ka jylla.
U Ma Sniawbha u la pynpaw ka jingkmen ban ïoh ïatrei lang bad u Dr D D Lapang kum u Myntri Rangbah namar u long uba sngewrit bad uba kloi ban sngap ïa kano kano ka jingud jingnam ki myntri bad ki MLA. U long uba kloi ban ïa kynduh bad la ki MLA bad wei ba u la buh por u bat ruh ïa ka por.
U la niewtang ïa kiei kiei kiba u la ïoh pdiang bad ïalam lynti jong u Dr D D Lapang bad u ong ruh ba dei u Dr Lapang uba wanrah ïa u sha kane ka saiñ pyrthei. U dei u Myntri Rangbah uba ju ïai ban ïa ki MLA bad ïa ki Myntri jongu kumno ban long kiba sngap bad shah shkor ïa ka jingud ki paidbah.
U ma Sniaw u la ïaroh ruh ïa ka jinglong jong u Dr Lapang ba u long uba don ka jingkitkhlieh, uba sngewrit bad u bym ju kyntait ban ïa kynduh bad kino kino ki briew naduh ki khynnah rit, haduh ki samla haduh ki tymmen ki kro. U long u briew u bym niew shilliang khmat bad peit poh ïano ïano ruh.
U la pynkynmaw ruh ïa ki kyntien ba u Dr Lapang u ju ïai kren “ Ngi don ha ka Saiñ pyrthei kumta ha ka politik ym don nongshun uba ïaineh shirta, mynta la ïashun shibit la ïa kdup hynrei kaei kaba kongsan ka long ban shakri hok ïa ki paidbah ”.
U ma Sniawbha u bah ka khubor sngewlem na u bad ka ïing ka sem jongu sha ka long ïing longsem u Dr Lapang kiba la sei ïa kum une u nongïalam. U la ong ba u long da shisha u nongïalam uba radbah bad uba sngewrit bad u la iehnoh shadien ïa ki dienjat kiba yn ïai kynmaw bad bud dien pateng la pateng.