U CS u la shim ka rai ba shlur ban khang ïa ka kynhun ba kwah pynlong yatra, Bah Toki Blah
Shillong, Nailur 29: U civil servant barim ka jylla u Bah Toki Blah u la ai ka jingïaroh ïa u Chief Secretary ka jylla u Bah Donald Phillips Wahlang ba u la shim ka rai kaba shlur ban ym shah ïa ka kynhun ba kwah ïada ïa ka masi ba kin wan hiar sha kane ka jylla ban pynlong ïa ka cow yatra.
“Nga la ïohsngew ba u Myntri Rangbah ka jylla u Conrad Sangma um don ha Shillong bad u la ieh ïa kane ka kam ba kin peit hi da ki officer, nga sngew sarong ba u Chief Secretary u la shim ïa ka rai kaba dei bad u la long u budlum ban khang ïa kane ka kynhun ba kin pynlong ïa ka rally yatra ban khang shoh doh masi ha ka jylla,” ong u Bah Blah.
Katba ka long kaba pdiang ba ka bor pynïaid district ka dei ban shim ka jingkitkhlieh ban peit ïa ka jinglong jingman ka shongsuk shongsaiñ, u Bah Blah u la ong, “Ngi khmih lynti ruh kumjuh ba u Myntri Rangbah (political chief) un kyrshan ïa ngi bad ban pynshlur ïa ngi kaei kaba dei ban leh haba wan kum kine ki jinglong jingman. Lada phi kiar ïalade na kane ka jingjia bad ba phah ïa ki ophisar sorkar ban leh ïa ka kam kane ka pyni ïa ka jinglong ba khawpud kum u Myntri Rangbah.”
U la ong ba kum u Myntri Rangbah, u Conrad u dei ban bud ki dienjam jong ki nongïalam kum na ka jylla Nagaland bad kiwei pat ki jylla kane ka thaiñ shatei lammingi. “Lada baroh arngut ki MLA ka BJP na ka jylla ki la pynpaw ïa kane ka jingpyrshah ïa ka jingthmu jong kane ka kynhun, kaei pat kaba la jia ïa ka NPP bad UDP bad baroh ki nongai buit jong ki? Balei ki la sngap ban pyrshah ïa kine ki briew kiba mut ban wan sha kane ka jylla ban ong ïa ki briew ka jylla kaei kaba dei ban bam bad kaei kaba ym dei ban bam,” buh jingkylli u Bah Blah.
U Bah Blah u la ong ba kane ka kynhun ka la leh kum ki beij kaba la jan wanrah ka jingkulmar ha ka jylla.
U la ong ba kum ki trai ri trai muluk kiba don la ki jong ki rukom bam, ka kolshor bad ka jingngeit, bad da kaba burom ruh ïa kane ka kynhun kaba sngew ba ym dei ban bam ïa ka doh masi bad ban pynlong ïa ka kum ka kmie ka ri, hynrei kim lah pat ban pynbor ïano ïano ban leh ïa kane ka juh ka jingkwah jong ki.