U Conrad u dei ban pyllait noh ïa ka tulop ba dang sah kum ka jingai sngewbha Christmas : Bernard

Shillong, Nohprah, 17: “U Myntri Rangbah u dei ban pyllait noh ïa ka tulop ba dang sah kum ka jingai sngewbha Christmas,” ong Vice President ka Bharatiya Janata Party (BJP) u Bernard N. Marak.
Haba kynthoh halor ka jingbym pyllait pisa jong ka tnat Pla Tyngka kaba peit hi da u Myntri Rangbah ka Jylla u Conrad Kongkal Sangma, u Bernard u la ong, “u Myntri Rangbah u la kham sngewtynnat ban pynlong ïa ki tamasa ba remdor katba kiba bun na ki nongtrei kim pat ïoh satia wat ïa ka tulop. Wat ki nongtrei ka GHADC, ki nonghikai SSA, ki nonghikai Adhoc, ki nongtrei kontrak, ki nongtrei COVID, ki Kontraktor bad kiwei pat kim pat ïoh satia ïa ka tulop kaba la sahteng la saw bnai kynthih.”
“U Myntri Rangbah, lada u sngrewthuh ïa ka jingmut ba shisha jong ka Christmas, u la dei ban ïaid kham jngai ban pynthikna ba yn ym don mano mano ruh ban diaw ha ka lehniam Christmas. U dei ban shim ïa ka jingkitkhlieh ban siew noh ïa ka tulop kaba dang sahteng namarba u dei uba bat ïa ka shuki kaba heh tam ha ka jylla,” la ong u Bernard.
“Ka lehniam Christmas ka la jan sa tang shi taiew hynrei kiba bun ki longiing longsem ki diaw namarba u Myntri Rangbah um i don mon satia ban ai ïa kaba ki paidbah ki donkam. Ka jingmut jong ka Christmas kan ym don shuh, lymda u Myntri Rangbah u pyndep ïa la kamram namarba ka tnat Pla Tyngka ka hap hapoh ka jingpeit jong u bad baroh ka shong ha ka jingshimkhia jong u,” la bynrap u Vice President ka BJP.
U la ong ba ka Sorkar Pdeng ka ladep ban pyllait ïa ka pisa hynrei ïa ka pisa kaba la bhah ban siew ïa ki nongtrei kontrak haduh mynta ka dang sahteng. “Lada jia kumno re kumno, ba ka pisa ka dang sah pongding ha ka Sorkar Pdeng bad lada don ka lad ngi lah ban ïarap kum ki nongtrei jong ka party, ngi long kiba kloi ban leh katba don ka lad,” ong u Bernard.
“Ka BJP ka long kaba kloi ban ïarap. Ka BJP ka kwah ban ai, ym ban shim kabu kumba leh kiwei ki party. Ka Antyodaya ka dei ka thong jong ngi bad ka BJP ka kwah ban pynthikna ba manla uwei pa uwei u nongshong shnong u dei ban ïoh ïa ka jingmyntoi,” u la ong.
U la pynpaw ruh ba ka PMAY, ka PM Kishan, ka IHHL, ki Job Card Holders, ka baibam tymmen, ka baibam jong ki thei ïap tnga, ki briew ba duna dkhotmet bad kiwei kiwei ki nongïoh jingmyntoi kim pat ïoh jingsiew eiei ruh em. Ban knieh noh ïa ka hok jong ki ha ka por Christmas kan pynlong ïa ka saiñpyrthei bad ïa ki riewsaiñ pyrthei kiba sniew. Ka BJP kan ym sngap jar katba ki paidbah ki dang shah leh bym hok ha ka Sorkar MDA ba la ïalam da ka NPP namarba ki long pyrshah ïa ki rukom treikam jong ngi haba ngi ïalap ïa ka sur kaba ong, “Sabka Saath, Sabka Vikas, Sabka Vishwas, Sabka Prayas.”
“Ïa u Conrad Sangma uba la thung Myntri Rangbah da ka BJP bad ïoh jingïarap pura na ka Sorkar Pdeng, u dei ban kitkhia bad ban pynthikna kano kano ka longiing kam dei satia ban shah pynduh ïa ka hok kaba ki dei ban ïoh,” ong shuh shuh u Bernard.