U Conrad Sangma u la ñiew poh ïa ki nongïaleh Hill State, ther u bah Robert Kharjahrin

Nongstoiñ, Nailar, 11: Ka soskular pynbeit pud kaba la dep ïasoi hapdeng ka Meghalaya bad Assam, ka la pynkhih win ym tang ïa ki paitbah ka thaiñ Malangkona, hynrei ïa baroh ki nongshong shnong kiba don ha shilynter khappud bad ka jylla Assam bad ïa baroh ki sengbhalang hapoh ka jylla.
Kumta ha kaba ïadei bad ka soskular jong ka jingpynbeit ïa u pud u sam ha ki lai tylli ki jaka kiba hap ha West Khasi Hills, ha kaba ki khawei tylli ki shnong kiba hap ha ka hima Nonglang Sirdarship kiba la shah khynñiat jubor sha Assam, ki nongïalam ka Hynñewtrep Youth Council West Khasi Hills mynta ki la pynlong da ka jingïaid paidbah ha Nongstoiñ ha kaba da ki hajar ki dkhot jong ka seng ryngkat ki paitbah Khasi bad Garo na khappud ki la wan ban ïashim bynta.
La sdang ïa ka jingïaid paidbah na khmat ka Rikhasi Free Morning School New Spengthawlangmlah haduh ban da poi ha New Nongstoiñ Market Complex, ha kaba la pynlong ïa ka jingïalang paitbah ha katei ka jaka. Ha ka jingialang ba pynïaid da u samla Lumlang Kharsyiemlieh President ka HYC West Khasi Hills, kham bun na ki nongkren kiba la shim bynta, ki la ther tyngeh ïa u Myntri Rangbah ka jylla u Conrad Kongal Sangma, da kaba ong ba u Conrad Sangma u dei u ba la nang la stad bha, hynrei ka jingstad jong u kam long ei ei namar um tip wat ïa u pud u sam jong ka jylla la jong.
U bah Robertjune Kharjahrin President ka HYC seng kmie u la ther tyngeh ha ka jingkren jong u bad u la buh jingkylli ïa u Myntri Rangbah da kaba ong, “Ko Conrad Sangma balei me ñiewpoh ïa ki nongïaleh Hill State kiba la pynïoh ïa ka jylla ba pura sanphew snem mynshuwa, lyngba ka jingshah set byndi bad ka jingshah khyrwit lathi ha ki pulit bad CRP. Hato mem tip ba haduh katno ka jingtyrha jong ki lak ngut ki volunteer kiba ïakhih ban dawa ïa ka jylloa ba pura haduh ba kin da ïoh?”
Utei u nongïalam ka seng u la ong ruh ba lada u Conrad Sangma un bakla biang ban pynbeit ïa ki jaka khappud kiba dang sah ki ban sa pynbeit ha ka wat kaba ar, u dei ban kynmaw ba ki paitbah ka Bri u Hyñniewtrep, kin ym shah shuh ba un dang wan ïuh kjat ha rilum Khasi Jaiñtia.
Nalor kata u la ong ba ka seng ka la trei shitom ban pan ïa ki rai na ka Political Department jong ka sorkar da ka Right To Information, halor ka jingïakut ne ka resolution ba ki ar ngut ki Myntri Rangbah ki la ïakut ha ka ban pynbeit ïa u pud u sam. Hynrei ka jubab kaba ki ïoh na u Public Information Officer, ka long tang ïa ka bynta ba hapdeng ka bym don nongrim satia. Hynrei ïa kaba sdang bad kaba kut ym shym la ïoh satia, namar ka jubab ka long ba kim shym rai ei ei ha katei ka jingïakynduh jong ki.
Utei u nongïalam ka seng haba ïakren bad ki nongthoh khubor hadien ba la wai ka jingïalang, u la pynshisha ruh da ki jingthoh jingtar ba ka jingthung jong ki ar sorkar ka Assam bad Meghalaya ïa ki Regional Committee on Border Dispute, ba kin leit jurip ïa ki jaka ha khappud bad ban pan ïa ka jingsngew jong ki paitbah la ki kwah ban leit sha Assam ne ki kwah ban sah ha Meghalaya, ka dei tang ka jingpyndep rukom ban lait na ka jingshah kynnoh ha ki paitbah. Namar ïa ki kaiphod ba ki Regional Committee ki la phah kim shym la burom satia.
Katkum ka ki kot ki sla ba ki la ïoh ka kaiphod ba la phah da ka Regional Committee jong ka sorkar Meghalaya, ka long katkum ka mon jong ki paitbah. Hynrei ka soskular ba ki la ïasoi pat kam shym long kumba la kdew ha ka kaiphod. Utei u nongïalam ka seng u la ong ba lada ka sorkar kam lah ban pynphai biang ïa ki khatwei tylli ki shnong bad lada ka bakla ban pynbeit ha ka wat kaba ar, ka seng kan ym ïakren shuh bad ka sorkar hynrei kan ïaid la ka jong ka lynti.