U CM u pynkyllaiñ ban ïalam bakla halor ka jingpyntreikam ïa ka Roster System: KHNAM

Shillong, Jylliew 12: Ka Khun Hynniewtrep National Awakening Movement (KHNAM) ha ka sngi Nyngkong ka la kynnoh ba u Myntri Rangbah ka jylla u Conrad K Sangma u pynkyllaiñ ïa ka jingpyntreikam ïa ka Roster System khnang ban ïalam bakla ïa ki seng saiñ pyrthei bad ki seng bhalang khnang ban ïoh pyntreikam ïa ka Roster da kaba phai shadien.
“Ka Sorkar ka ong ba ka Roster kan ïaid Prospective (Shakhmat) hynrei ka jingbuh jingkheiñ ha ka Roster Register/Account naduh u snem 1972 ka thew ba ka roster kan dei ka retrospective (na shadien). U Conrad u shu pynkyllaiñ da kaba ong Continuous Process tang ban pynbieit bad ïalam bakla ïa ki political party bad seng bhalang ban ong ba kam dei shuh ka retrospective hynrei kiba kham shemphang hi ki sngewthuh ba kane kaba u pynkylla ruh ka dang dei hi ka retrospective roster system bad ngi lyngoh ba ki seng UDP, HSPDP, bad Congress ki ngop ha kane ka jingpynbeit ka NPP,” ong ka kyrwoh na u Working President ka KHNAM u Bah Thomas Passah.
“Naduh ba sdang U CM u la shu ong beit ba kadei ka continuous process bad ym don retrospective lane Prospective, hynrei ha ka political party meeting, haba ka seng ka buh jingkylli, lada kam dei kata ka retrospective te kumno pat ka MPSC ha u bnai March 23, ka pynmih ïa ki result ha kaba 11 seat la ïoh U Garo bad tang 5 seat la ïohi U Khasi? bad ka sorkar ka la phla pat ba ha shwa u bnai May 23 ki Garo ki ïoh bun namar kadei ka Retrospective hynrei ki la kular ban pynmih ïa ka OM ba thymmai ban pyntreikam noh Prospectively noh ïa ka Roster. Hynrei ngi ïohi ba U CM haduh mynta u dang ïai ong ba kadei ka continuous process bad ïa ka data donkam ban shim jingkhien naduh u snem 1972 (retrospective),” bynrap.
U la ong ruh ba ka sorkar ka dei ban pyntrikam beit ïa ka Roster da kaba sdang beit na u snem 2022 namar baroh ki tnat sorklar kim biang shuh ki jingkheiñ halor ka jingdon kiba ïoh kam kat kum ka Reservation Policy.
“U Conrad u ong ba ïa ki post ki bym don ne biang ki data ka roster point kan sdang na u 1. Hynrei, ngi tip ba baroh ki post kim biang data shuh haduh u 2022 namar ki result notifications jong ka MPSC,etc kim pyni category-wise break-up of recommended/appointed candidates ha ki snem 1972-2022. Te namar kata, ym don jingkheiñ katno ngut bad kiei kiba ïoh na ka UR/open, kiei kiba ïoh na ka Khasi-Jaiñtia quota, kiei kiba ïoh na ka Garo quota bad kiei kiba ïoh na ka OST quota. Bad dei halor kane ka nongrim ba ka seng ka ïai dawa ba dei beit ban start from 1 ïa baroh khoit ki post,” ong ka kyrwoh.