U bynriew u dei u nongshun ba khraw bad ka daw ka jingtyrkhong um : Bah Renikton Lyngdoh

Nongpoh, Lber 22: Kum ka jingshibynta lang ha baroh kawei ka pyrthei ban rakhe ïaka sngi jong ka um lane ka World Water Day, naka bynta ban pynphriang ïaka khubor halor ka jingdonkam ka um bad pynneh pynsah ïaki tyllong um, ka District Water and Sanitation Mission, Ri-Bhoi District mynta ka sngi kala pynlong ïaka jingrakhe ïaka World Water Day ha madan NSCA Mini Stadium Pahamsyiem halor ka phang ‘Ground Water- making the invisible visible’.
Ha katei ka sngi la wan ruh ban shim bynta da u Myntri ka tnad PHE ka jylla u Bah Renikton Lyngdoh Tongkhar kum u kongsan haka jingdonlang u Bah Mayral Born Syiem MLA ka Nongpoh, ki ophisar naka tnad PHE, ki khynnah skul, ki nongïalam shnong bad kiwei kiwei ki riew rangbah.
Haba kren ha katei ka sngi naka liang u Bah Renikton Lyngdoh Tongkhar u la ban jur halor ka jingdonkam baan pynneh pynsah ïaka mei mariang khamtam ki tyllong umdih bad ka dei ka jingkitkhlieh jong uwei pa uwei u nongshong shnong ban kyndit bynriew noh shuwa ba ka nem sniew jong ka jingkyrduh um kan wan lyngshop ha kane ka jylla bad kiwei kiwei ki jaka jong ki ri ka pyrthei.
“U bynriew u dei u nongshun bakhraw jong ka mariang bad ka dawbah jong ka jingkyrduh um, bad bun naki paidbah ha ka jylla mynta ki mad ka jingkyrduh um ba shyrkhei namar bun naki tyllong um kila sdang ban rngad bad tyrkhong noh naka jingpynjot pathar ïaka mei mariang khamtam ka jingpom pathar ïaki dieng ki siej, bad ka dei ka por ba ki paidbah ki dei ban kyndit bynriew noh naka jingiohthiah ban pynneh pynsah ïaki khlaw ki btap, ki tyllong um dih bad ka mei mariang sawdong sawkun” ong u Bah Renikton da kaba kyntu ruh ïaki paidbah ba kin phikir bad kiar naka jingpynjot ïaka mariang hynrei ban sumar bad ban pynneh pynsah ïaki tyllong umdih.
Ha katei ka sngi la pynshit pynshngaiñ ruh da ki jingrwai bad ki jingshim bynta da ki paidbah bad ki khynnah skul haki prokram bapher bapher kum ka jinghikai ban pynneh pynsah ïaka um bad ki tyllong umdih.