Jowai, Naiwieng 03: Kumba ju long ka Balang Katholik Parish Jowai ka ju pynlong shisien shisnem ka jinglehburom ïa ka ktien ka jong U Blei da ka jingïaid proseshon ïa kane ka jinglehburom ïa ka ktien ka jong U Blei ha kane ka snem la pynlong ha ka Balang Shnong Salini, Mihmyntdu ha ka sngi U Blei ha kaba palat ïa ki san hajar ngut ki paid riewngeit ki la ïa wan ban shim bynta ha ka Proseshon kaba la sdang na Salini sha Reserve Police- Lad-Kiang Nangbah College bad wanphai biang sha Salini bad pynkut da ka jingkyrkhu da ka Baible bad ka Sakramen bakhuid tam ka Duwan.
Ha ka por mynstep la pynlong ïa ka jingkñia Mass Bakhuid kaba la pynmynta da u Rt. Rev. Bishop Ferdinand Dkhar ka Jowai Diocese ha ryngkat ka jingsynran lang ki Lyngdoh Sohblei, u Rev. Hilarius Lamare, u Rev. Manbha Pakem bad u Rev. Laurence Paswet, nalor ba ki paidriewngeit ki la ïashim bynta shongkun shongblei la nangpynkhraw shuh shuh ïa kane ka sngi da ki heprit kiba pdiang ïa ka Komunion kaba nyngkong kaba long ka Met bad ka Snam jong u Trai Jisu Khrist ha ka jingim jong ki.
U Bishop Ferdinand haba kren ha kane ka sngi u ong ba ha ka por kaba U Trai Jisu Khrist, Uba long U Blei, haba u dangïaid dangïeng ha kane ka sla pyrthei u kren da lade hi ha ki briew, hynrei mynta U Blei U kren ha ngi lyngba ka Kot, ka jingthoh bakhuid ka “Ka Baible”.
Nangta u ong kumno ngi pyni ba ngi ieid ïa U Blei bad sngap ïa ka ktien jong u, kaba ngi pyni bad sngap ïa ka ktien jong u da kaba ngi pule ïa ka jingthoh bakhuid (Baible) bad ym tang ba ka Jingthoh Bakhuid ka kren ïa ngi ban ieid ia u Blei, ngin ieid ruh ïalade, ïa ki paramarjan bad ïa ki paramarjngai,.
“Ngi sngewnguh ïa ka ktien ka jong u Blei kaba ula ai ha ka pyrthei bad ka proseshon kaba ngin ïaid ha ka nohphai sngi ka long ka dak kaba ngi burom bad pynbna pyrthei ba ngi ieid ïa ka ktien ka jong u Blei,” u la ong.
U Bishop Ferdinand u kyntu ïa baroh ban ïa im sngi ban pule ïa ka jingthoh bakhuid kaba long ka ktien ka jong u Blei bad ai ba ka ktien ka jong u Blei kan sawa bad ngin sngap ha dohnud ha baroh shilynter ka jingim jong ngi pynkut u Bishop Ferdinand Dkhar.
