U Bah Sanbor u la leh bakla ban pyrshah ïa u Lamphang, ngan sa leh ïa kaba donkam: Conrad

Shillong, Naitung 8 : U Myntri Rangbah ka jylla u Conrad K Sangma mynta ka Sngi Thohdieng u la kular ban shim khia bad leh ia kaba donkam halor ka jingleh khlem akor jong u Myntri jongu u bah Sanbor Shullai ha ka por ba u Lamphang ka jylla u dang ai jingkren ha Orchid ha ka 6 tarik Naitung 2022 ka sngi ba wan ka kyrtong jongka NDA sha kane ka jylla ka Draupadi Murmu ban pan jingkyrshan na ki MLA bad MP ka jylla.
ïa kane ka rai u la shim shisngi hadien ba ka United Democratic Party (UDP) ka la ïa kynduh bad shim rai ban dawa na ka BJP bad u Myntri Rangbah ka jylla u Conrad K Sangma ban pynsaja ïa u bah Sanbor kat kum kat kum ka bor bad iktiar jongu kum u myntri rangbah namar kane ka jingleh jongu ka la ktah ïa ka iktiar jong u bah Metbah Lygndoh kum u Lamphang ka ïing dorbar ka jylla bad kumjuh ruh kum u President ka UDP.
U Myntri Rangbah u la ïathuh ba ula ïa kynduh ïa u Lamphang uba la ïathuh ruh ha u ïa ki rai ba la shim da ka UDP ha ka jingïalang ki MLA hynnin ka sngi.
“ Nga la ïathuh ba nga la shim khia bha ïa kane ka kam bad ngan sa leh ïa kaba donkam ha ka por bad ka ïa kaba biang tam. Nga la kular ba ngan leh ei ei halor kane” ong u Myntri Rangbah.
U Myntri Rangbah ula ïathuh ba u ruh u don lang ha katei ka jingïalang ha ka por ba u Lamphang u ai jingkren bad pynpawïia kiba bun ki jingeh ba ki jaidbynriew riewlum ki ïa kynduh ym tang ha ka jylla hynrei ha kylleng ka ri India.
“ Ka long kaba dei eh ban pynpaw ïa kine ki mat hakhmat jong ka kyrtong President namar kan sa shong ha ka shuki shen khnang ba kan ïoh ban bud dien bad peit ïa kine ki mat ba la wanrah da u Lamphang bad dei ha ka por ba u dang kren halor kine kiei kiei ba u myntri sorkar na ka BJP u bah Sanbor Shullai u la ïeng bad pynthut ïa ka jingkren. Ha ka jingshisha ha kum katei ka jingïalang ba ki pynlong ban khot ïa ka jingkyrshan ki MLA ym dei satia ban pynpaw ïa kum katei ka jingleh kaba ngi la ïohi ha katei ka sngi.Ka i long khlem akor bha bad kam dei hi ruh ban kren ne pynpaw ha khmat jongka kyrtong President namar kam long kaba itynnad satia” ong u Conrad.
Haba la kylli kaei kaba u Myntri Rangbah un leh ïa une u myntri jongu uba leh kumne, u la ïathuh “ Ngin lum shwa ïa ka jingïalang ka MDA ban ïakren shwa halor ka jingjied President ha ka 18 tarik nalor nga lah ban wanrah ïa kane ka mat jingïakren ruh tangba ïa ka rai ngan sa shim ha ka por kaba biang”.
U la ong ka BJP ka la khot ïa ka jingïalang ban pan jingkyrshan na ka bynta ka kyrtong President ka NDA bad nga la leit ruh kum u National President ka NPP. U la ïathuh ba ïa ki MLA ka UDP ruh la khot sngewbha hi da ka BJP kumta kam dei kaba leit kum ka MDA bad mynta ba dei ka por election man la ka party ki don ka hok ban pynpaw ei ei.
Ym don jingpher satia ban rah ïa kino kino ki mat jingkren halor ki riewlum namar kan sa shong ha ka shuki kaba ha khlieh tam ha ka ri bad ka dei ka kabu ïa ki nongthep vote ban pynpaw ïa ki mat kiba ktah ïa ki riewlum bad ka dei kata ruh kaba u Lamphang u kren kum u President ka UDP bad kumta ka jingleh jong u myntri kam long kaba dei.
Hato kane ka jingjia ka pynpaw ba kam don ka jingïasngewthuh jingmut haka MDA u myntri rangbah ula jubab “Tang uwei uba ïeng bad leh ha ka por ba kren u Lamphang bad kumba nga ong ka por, ka jaka bad ka jingïadon lang ki briew na bar kam long kaba itynnad ban jia kum kane ka jingjia bad kam dei hi ruh ka jaka ban pynpaw ïa kum kato ka rukom leh”
Hynrei te ki don bun ki jingïakren, jingïatai bad jingïathir kiba ngim ju ïabeit jingmut ruh bad kane ka ju jia barobor ha ka sorkar synrop lang hynrei wat la katta ruh ngi ia long kawei bad ym don ka jingïapher jingmut”.
Haba la kylli hato ka dei ka jingshisha ba u bah Sanbor ul a tied miej ha kamra ophis jong u myntri rangbah, u la ong “Ki don ki khep ba ki myntri kim sngew ïahap bad ki rai jong nga hynrei kaei kaba ïakren hapdeng jong nga bad no badno la ka dei bad ki myntri, ki MLA, ki nongïalam party ne badno badno ruh kata ka sah beit tang hapdeng jong ki bad nga. Kam dei ka rukom ïa nga ban leit thad shawei ne ban ïathuh hawei namar ym shym la leh hakhmat ki briew ne paidbah kumba la leh ha kato ka sngi kata ruh hakhmat ka kyrtong President”.