Nongstoiñ, Ïaiong 01: Ki dkhot jong ka Awaken India Movement kiba na Nongstoiñ West Khasi Hills, ha ka sngi balang ki la leit ban ïakynduh bad ai jingthoh hakhmat ka Deputy Commissioner ka District, ka Smt Hema Nayak (IAS) halor ka nongrim ban pan jingshai ba hato ka dei ne em ban pynduh ïa ka hok jong ki paidbah ki bym treh Adhaar.
Kane ka kynhun hapoh ka jingïalam jong ka kong B.Kharbani ki la ïakynduh markhmat kum ka jingpan jingshai na ka Deputy Commissioner, ban pan jingpynshai la ka dei ne em ban pynduh ïa ka hok jong ki paidbah ki bym treh Adhaar, haba ïatyngkhuh bad ki scheme bapher bapher kiba la wan lyngba ka sorkar.
Nalor ka jingthoh, ka seng ka la ai copy ruh ïa ki order kiba ka seng ka la ïoh na ka High Court, kaba la kdew shai ba u Adhaar card um pat dei u ba long kongsan lane Mandatory.
U nongthoh khubor haba ïoh ban kylli pyrthew na ka Deputy Commissioner, hato ka ïing bishar ne ka High Court jong ka jylla Meghalaya ka ong kumno. Katei ka ophisar ka la ong ba ka kam hi ka ïatyngkhuh ha ki bynta kiba bun, pynban na ka liang jong ka, kan sa pan ïa ka jingbthah ne ka jingpynshai na ka sorkar jylla.
Na ka liang jong katei ka Deputy Commissioner ka la kular ruh ban shimkhia ïa ka shithi ba la ai da ka seng AIM bad ban ïarap halor katei ka kam. Hynrei, ki nongïalam jong ka seng pat ki la kyrpad ïa kiwei ki ophisar ba kim dei ban shu leh don bor, lym kumta ka seng kan sa leh ïa kaba donkam pyrshah ïa ki lada ki dang pyneh.
