Shillong, Ïaïong 03: Ka West Khasi Hills kala rung sha ka final jong ka lympung ïalehkai U-23 Women’s Inter District Cricket Tournament ba pynïaid da ka Meghalaya Cricket Association (MCA) hadien ba kala khur jingjop da kaba pynliem da phra wicket pyrshah ïa ka East Khasi Hills ha ka jingïakhun kaba khatduh ha ka Zone 1 ha ka sngi Saitjaiñ ha Nongstoin.
Ha kane ka sngi ka West Khasi Hills kala lah ban ïalehkai bha naduh ka kamai ron bad kawang bol. Ka West Khasi Hills kaba la kawang bol nyngkong ka la lah ban teh lakam ïa ka jingkamai ron ki thei tied ka East Khasi Hills da kaba pynhap lut baroh ki wicket ha kaba ka EKH ka kamai tang 72 ron ha ki 27.5 over.
Ka Ridahun Nongsiej kala lah ban ïalehkai bha ha kaba kala khur 3 wicket ai kamai 10 ron bad kumjuh ruh ka Banrihun L Nongbri kaba khur 3 wicket ai kamai 15 ron. Katba ka Evanrilin S Syiem kala ïarap khur 2 wicket ai kamai 13 ron na bynta ka West Khasi Hills .
Haba wan beh ïa katei ka ron, ka West Khasi Hills ka khlem lah ban kamai ron ha kaba sdang, ha kaba ka Sildamicresha Marbaniang kaba tied nyngkong ka kamai 42 ron na ki 37 bol da kaba khyrwit hyniew tylli ki boundary.
Hynrei ka WKH kaba la ïalehkai hala ïing ka la ïoh mynsiem bha na ka daw ka jingbym lah kamai ron bun ka liang pyrshah ha kaba kala pynliem syndon da phra wicket.
Kumta ka West Khasi Hills mynta kan pynkhreh ban ïa aireng pat pyrshah ïa ka South Garo Hills ha ka state final ban knieh nam lahduh kaban long ha ka 5 tarik Ïaïong 2022. Ka South Garo Hills kala ïoh ban rung sha ka final bad kadei ka kynhun ba don ha ka kyrdan ba nyngkong ha ka Zone 2.
