Shillong, Lber 25: Ka East Khasi Hills bad ka South Garo Hills kila khur jingjop hala ki jong ki jingïalehkai jong ka lympung U-23 Women’s Inter District Cricket Tournament ha ki jingïakhun ha ka sngi Thohdieng.
Ha ka Group A jong ka Zone 1, ka EKH kala pynliem da 67 ron pyrshah ïa ka All Jaintia Cricket Association, katba ka SGH kala khur jingjop da kaba pynliem da khyndai wicket pyrshah ïa ka East Garo Hills ha ka Zone 2.
Ka EKH kaba la jop ïa ka jingkynting pisa kala kam trai ban tied nyngkong, hynrei ki thei tied kim lah ban da kamai ron, hynrei kila ïoh bun lyngba ki extra, ha kaba kala kamai 119 ron bad shah pynkhyllem lut baroh ki wicket ha ki 24.2 over. Ka Aidashisha Shadap ka khur 3 wicket ai kamai 12 ron bad ka Ritreki Pohshna ka khur 3 wicket ai kamai 21 ron na bynta ka AJCA. Haba beh ïa katei ka ron, ka Pohshna ka kamai 23 ron (not out) ha kaba ka AJCA ka kamai rang 52 ron bad duh noh 9 wicket, (kawei ka thei tied ka la hap ban shong ben noh na ka daw ka jingmynsaw. Ka Blarida Dkhar marwei ka khur 3 wicket ai kamai 11 ron bad ïoh ruh ïa ka khusnam Player-of-the-match.
Ha kawei pat ka jingïalehkai, ka EGH kala kam trai ban tied nyngkong hynrei na ka daw ka jingtbit ki thei kawang bol ka SGH, ka EGH ka kamai tang 16 ron bad shah pynhap lut baroh ki wicket. Ka Jaylynn M Marak kaba la ïoh ruh ka khusnam Player-of-the-match ka khur marwei 4 wicket ai kamai 5 ron ha ki saw over, katba ka while Smillin N Sangma ka pyndep da kaba khur 3 wicket ai kamai 9 ron bad ka Urmilla A Sangma ka ïoh 2 wicket ai kamai 2 ron na bynta ka SGH.
Mynta ka sngi (26.03.2022) ha ka Group B jong ka Zone 1, ka South West Khasi Hills kan ïakhun pyrshah ïa ka Shillong CA, katba ha ka Zone 2 mynta ka sngi kan ym don jingïakhun.
