Shillong, Lber 27: Ka century bad ar tylli ki wicket na ka Neha Hajong ka Shillong Cricket Association kala khur jingjop da kaba pynliem da 73 ron pyrshah ïa ka South West Khasi Hills ha ka lympung ïalehkai U-23 Women’s Inter District Cricket Tournament ha ka jingïalehkai ha ka sngi Saitjaiñ ha Nongstoin.
Ha kane ka jingïalehkai ka SCA kaba la jop ïa ka jingkynting pisa kala kam ban tied nyngkong na ka Group B jong ka Zone 1.
Da kaba wan ban tied nyngkong, ka Neha Hajong kaba ïoh ruh ïa ka khusnam Player-of-the-match ka kamai 119 ron na ki 18 bol, da kaba khyrwit 11 tylli ki boundary ha kaba ka SCA ka kamai 211 ron bad duh noh 6 wicket ha ki 35 over. Ka Darisha Wahlang marwei ka khur 3 wicket ai kamai 53 ron na bynta ka SWKH.
Haba beh ïa katei ka ron, ka SWKH ka la shah pynhap noh 9 wicket bad kamai tang 138 ron ha baroh ki 35 over. Ka Indariakor K Wanniang ka kamai bun ron da 22 ron. Ka Reshma Thapa ka pyndep da kaba khur 3 wicket ai kamai 15 ron, katba ka Hajong ka khur 2 wicket ai kamai 12 ron bad ka Mansi Anand ka ïoh 2 wicket ai kamai 33 ron.
Mynta ka sngi Nyngkong, ha ka Group A jong ka Zone 1, ka Ri-Bhoi kan ïakhun pyrshah ïa ka East Khasi Hills. Ha ka Zone 2, ka North Garo Hills kan ïakhun pyrshah ïa ka East Garo Hills.
