U-23 Col CK Nayudu Trophy: Sah kumjuh ka thup kynhun jong ka jylla na bynta ka jingïakhun ba san

Shillong, Naiwieng 14: Ka komiti jied player na bynta ka kynhun ïalehkai Under-23 (senior men selection committee) jong ka Meghalaya Cricket Association ka la pynbna ïa ka thup kyrteng kaba ym shym la pynkylla na bynta ka jingïalehkai kaba san jong ka lympung U-23 Col CK Nayudu Trophy pyrshah ïa ka Railways, ka ban sdang naduh la sngi Thohdieng shabar nala ïing, kata ha madan kriket ha Rajkot, Gujarat.
Ka jylla ka la kiew sha ka kyrdan elite hadien ba ka la wan ba ar ha ka thup ïakhun Plate group ha ka samoi ba ladep, ka Meghalaya ka la mad namrem ha baroh saw sien ki jingïalehkai pyrshah ïa ki kynhun ba khlaiñbor, kynthup ïa ka Punjab, Andhra Pradesh, Himachal Pradesh bad ka Rajasthan.
Ka jingïalehkai kaba dang shen pyrshah ïa ka Rajasthan ha ka taïew ba ladep la sakhi ïa ka rukom lehkai kaba kham bha watla ka Meghalaya ka la shah rem da ka inning bad 29 ron.
Ha katei ka jingïakhun, ym lah ban len ba u Manish Sharma u la long u ba kongsan napdeng ki rangïalehkai ka Meghalaya, da kaba khur 6/110 na ki 39.4 over ha ka bol ha kaba ka Rajasthan ka la shah pynhap noh da 352 ron, bad u la lah ban kamai 62 ha ka tied ha kaba ka Meghalaya ka la lah ban kynjoh 143/10. Hadien nangta, u Sachin Kumar u la khyrwit 68 ron ban wan hakhliehduh napdeng ki player ba kamai bun ron ha kaba ka Meghalaya ka la shah pynhap noh da tang 180.
Ka Meghalaya mynta kan kyrmen ba kan ïalehkai kham bha shuh shuh ynda ki la ïakhun pyrshah ïa ka Railways naduh mynta ka sngi. Ka Railways ka la jop ïa kawei na ki saw tylli ki jingïakhun, ha kaba ka la ïakhaid arsien bad shah rem shi sien.
Ka kynhun ïalehkai jong ka Meghalaya pyrshah ïa ka Railways ki long: Kevin S Christopher (C), Manish Sharma (V-C), Rohit Kr Yadav, Sachin Kumar (WK), Abhishek Kumar, Kush Agarwal, Gavineal J Marpna, Bipin Kr Ray, Josiah Momin, Joydeepan Deb, Banialam Mylliemngap, Gulgul Sangma, PM Santhosh, Thunun Marak (WK), Swastic Chettri
Standbys: Agreas Cham Cham Sangma, Navin K Ray, Aman Kumar, Bharat Gurung, Raghav Magotra
Support staff: Neetesh Sharma (Head Coach), Synrapsing Riahtam (Assistant Coach), Emidao Dhar (Physio), Skhembor Khongbtep (Trainer), Chuba R Marak (Manager)