Shillong, Naitung 09: Ka Laitumkhrah SC ka la hap ban ïakhun tyngeh ban wanphai bad pynliem ïa ka Iateilang SC da 4-1 kol ha kawei na ki jingïalehkai jong ka lympung U-20 Fourth Division 2025 ba la pynïaid da ka Shillong Sports Association ha madan First Ground-SSA Stadium, Polo hynne ka sngi Balang. Kawei pat ka jingïalehkai la ïohi ïa ka Laitlulong SC kaba la jop da 4-1 kol ïa ka Mawpdang.
Ka jingïalehkai kaba nyngkong dei ka Iateilang kaba la pynkhihjar shuwa tang ha ka minit kaba 4 lyngba u Wankitbok Kharumnuid. Ka Iateilang ka la ïaid shakhmat ban kyrshan ïa kane ka kol lamkhmat shuwa ba ka Laitumkhrah kan jubab ha ka minit kaba 57 lyngba u Dapmain Nongsteng (57′).
Naduh kane ka por ka Laitumkhrah ka la sdang ban ïoh jingkyrmen tad haduh ba kan da ïoh ban thep sa lai tylli ki kol ba la wan na u Hamlet Thabah (70′ & 80’min) bad na u Dabetskhem Rympei (78’P) kaba la pynthikna ïa ka jingjop.
Kane ka jingjop kamut ba ka Laitumkhrah kan jam shakhmat sha ka wat ïakhun kaba bud kum ka lahduh jong ka Group E.
Ka jingïalehkai kaba bud, ka Mawpdang ka la pynkhihjar nyngkong lyngba u Vishalstar Nongbri (11′) hynrei ka Laitlulong ka la ïoh ban pynïakhaid noh shuwa ban kut ka kylla step, lyngba u Bankerlang Khardewsaw (36′), shuwa ba un thep biang ha ka minit kaba 63 bad kumjuh ruh ki ar kol lyngba u Donkupar Kharbani (58 & 79’min).
Ka prokram ïalehkai mynta ka sngi, yn sakhi ïa ka Pynthorbah pyrshah ïa ka Nongkohlew, ha ka por 1:30 baje mynsngi, nangta bud sa ka jingïalehkai hapdeng ka Mawshbuit pyrshah ïa ka Laitkroh ha ka por 4 baje nohphai sngi.
