Shillong, Risaw 13: Ka kynhun ki rangïalehkai kriket U17 jong ka jylla Meghalaya, ki la ïoh ban khur ïa ka jingjop kaba nyngkong ha ka lympung U-19 Vinoo Mankad Trophy 2025-26 hadien ba ka la pynliem noh da 71 ron ïa ka Arunachal Pradesh ha ka jingïalehkai plate group kaba la long ha Chandigarh hynne ka sngi Nyngkong.
Ka Meghalaya ka la shimti ban tied nyngkong hadien ba jop ïa ka jingkynting pisa (toss) bad ka la shah pynkhyllem noh na ka bynta 137 ron haki 40.3 ober. Hadien kane ki la khanglad ïa ka Arunachal tang na bynta 66 ron haki 17.3 ober.
Ka Arunachal ka la sdang bha ha por boling, da kaba pynduna ïa ka Meghalaya sha ka 22/3 hynrei ka jingïatreilang jong u Rudra Singh Rathor (21) bad u Angkit Tamang (67 not out) ka la bynrap ïa ka kynhun da 27 ron na ka bynta u wiket uba saw. Khlem u Angkit, ka jingïalehkai jong ka Meghalaya kan jin da la long kaba pher namar ba u dei u mawsiang ïa ka kynhun ha kane ka jingïakhun. Da kaba long janai ha ka tied, u la mad ïa ki 124 tylli ki bol bad u la thlieh hynriew tylli ki saw (four) ron bad kawei ka hynriew ron (six) ban pyndep ïa ka Inning tied khlem da shah pynhap (not out) katba kiwei pat ki nongtied jong ka kynhun ki la khyllem noh.
Watla kam dei ka thong kaba heh, hynrei ka 137 ron ka la biang ban ai ïa ki nongkawang bol ïa kaei kaei ban ïada. Hadien ba u Mewankitbok Kharpuri u la ïoh ban khur haduh 9 wiket ha ki ar tylli ki jingïalehkai ba nyngkong, ha kane ka jingïakhun u khlem shym la lah ban wanrah biang ïa kajuh ka jingïalehkai kaba kyrpang hynrei ki paralok nong bowling jong u ki la ïatreilang ban pynmih ïa ka jinglehkai ba seisoh jong ki. U Apandanka Marak u la khur 4/25 ha ki 7 ober, u Angkit u la khur 4/10 ha ki 4.3 bad u Gaurav Narleng 2/10 ha ki 3 ober, ha kaba ka Arunachal kam shym la ïohlad satia ban ïoh ïa ka jingkyrmen ban beh ïa ka thong.
Hadien ar tylli ki namrem, kane ka la long ka jingjop kaba khraw ka ban ai mynsiem ïa ki khynnah shynrang jong ka Meghalaya bad kin kyrmen ban bteng ïa kane ka kajuh ka mynsiem ïakhun sha ka jingïalehkai kaba hadien jong ki, ka ban long pyrshah ïa ka Nagaland ha ka sngi Balang.
