Shillong, Nohprah 17: Ka Meghalaya ka la buh ïa ka thong kaba long 248 ron ïa ka Mizoram ba kan beh ban jop ha ka jingïalehkai plate group ka lympung U-19 Men’s Cooch Behar Trophy 2025-26, kaba la long ha Anand, Gujarat hynne ka sngi Balang.
Haba wan ban bteng ïa ka pali tied ba nyngkong na ka 129/5, ka Mizoram ka la kloi hap noh ki wiket ba sah tang na ka bynta 177 ron, kaba pynlong ïa ka ban sahdien sa 42 ron na ka thong ba la buh jong ka Meghalaya ha ka pali tied ba nyngkong (219). Nangta ka Meghalaya ka la shimti ïa ka pali tied kaba ar (2nd inning) da kaba kamai 205 ron.
U Malsawmmuanzela uba la kamai lypa 32 ron, hynne ka sngi kaba bud, u la lah ban kamai tang shi ron hashwa ba un weng (out) noh ha u Angkit Tamang (2/14), hadien kane u Eric u la ïeng ïakhun da kaba u la lah ban kamai 22 ron, hynrei um shim la ïoh ïa ka jingkyrshan na la ki paralok, kaba pynlong ïa ki ban duna da kumba 42 ïa ka ron ba la lah ban kamai ka Meghalaya ha ka pali ba nyngkong.
Ha kane ka kynti, ka Meghalaya kam shim la pyndonkam pura ïa u Namewanki Pakyntein, pynban u dang lah pat ban ïai bteng ban bol bha tad haduh ba u la ïoh ban khur 3 wiket na bynta 25 ron, ïa kaba la bynrap lang da u Mewankitbok Kharpuri (2/43), Gaurav Jyoti Thakuria (1/0), Sameer Choudhury (1/12) bad Gaurav Narleng (1/27).
Haba wanphai biang sha ka pali kaba ar (2nd Inning), ka Meghalaya ka la pyrshang ban ïakhun kham suki hadien ba u Mannan Surana (27), Sameer (24) bad Dipayan Nandi (57), ki la kamai ïa ki ron kiba ka kynhun ka donkam, hynrei ka jingeh ba la ïa kynduh pat hangne ka long ba ka Meghalaya kam lah ban ïoh ïa ka jingïatreilang kaba heh bad kaba neh slem, ha kaba ka la hap noh 7 wiket bad ka ron ba ka la kamai ka long tang 148 ron, hynrei shwa ba kiei kiei kin lam sha kaba kham eh, u Rudra Singh Rathor (27) bad u Heiyoomiki Ryngkhlem (35 not out) ki la ïatreilang ban noh synñiang 40 ron na ka bynta u wiket ba phra. Kane ka la pynskhem ïa ka Meghalaya bad ba kan lah ban jam biang sa shisien palat ïa ka ar spah ron.
Ka pali wan tied kaba ar ka Meghgalaya ka la kut thik ha ka por ba dei ruh ban pynkut noh ïa ka sngi kaba ar jong ka jingïakhun, ha kaba ka Mizoram, kam shim la ïoh satia ïa ka lad ba kan wan ban beh ïa kne ka thong ha kane ka sngi. Kane ka jingïakhun kan jam pat sha ka sngi kaba lai kaba hangne baroh ar kynhun la khmih lynti ba kin ïa shat ïa la ki jong ki khmat ba kin kthong ïa ka nam jong ka jingjop.
