Shillong, Dec Nohprah 18 : Ka Delhi ka la pynliem ïa ka Meghalaya da ka inning bad 209 ron ha ka U-16 Vijay Merchant Trophy ha ka jingïalehkai ha ka sngi Saitjaiñ ha Vadodara.
Haba bteng biang ïa ka jingïalehkai kaba arsien ha ka jingkamai da 248/2 ban beh ïa ka jingkamai ron jong ka Meghalaya kaba kamai 106 ha ka inning kaba nyngkong, ka Delhi ka la kynjoh sha ka jingkamai ba 419/3. U Benedict Jones Makdoh u khlem ïoh shuh ban pynhap wicket na ka jingïoh shim wicket ha ka jingïalehkai kaba nyngkong bad pyndep ïa ka inning da 1/58. U Angkit Tamang (1/72) u ïoh shi wicket ha kane ka jingïalehkai, katba ïa ka shi wicket pat la ïoh ban pynhap wicket da ka run out lyngba u Aristo Marak.
Ka Meghalaya kaba donkam ban jop da 319, u Rudra Singh Rathore u kamai 42 (8x4s) katba u Kishlay Vishlux u kamai 23 ron. Kitei ki arngut ki buh da 55 ron na bynta ka jingduh noh saw wicket hadien ba ka Meghalaya ka la duh ki lai wicket bad kamai tang 15 ron.
Ka Meghalaya kan ïakhun sa ïa ka Hyderabad naduh ka 21 tarik Nohprah.
