U-15 Boys’ Subroto Cup 2024: Rung quarter final ka Meghalaya
Lai sien lynter khyrwit hat trick u Chanjib Chetry, 8 kol pynliem ka jylla ïa ka DNH&DD
Shillong, Nailar 23: Ka Nongjri Presbyterian Secondary School na Ri-Bhoi District ba mihkhmat ïa ka Jylla Meghalaya ka la jam mynta sha ka wat ïakhun quarterfinal ha ka lympung U-15 boys’ Subroto Cup. Kane la pynthikna hadien ba ka la pynliem kput ïa ka Dadra & Nagar Haveli and Daman & Diu haduh 8-0 kol, ha ka jingïalehkai ba khadduh na ka Group-B ha Bangalore.
Lah ban kdew ba ka kynhun ïalehkai Under-15 jong ka Meghalaya ka la jop baroh lai sien lynter ki jingïalehkai na ka Group B, da kaba sdang jingjop da 6-0 kol ha ka jingïalehkai ba nyngkong pyrshah ïa ka kynhun na Sri Lanka, hadien nangta ban jop da 7-0 kol ïa ka ISSO ha ka Sngi Palei. Kawei pat ka kynhun na kane ka thup ka dei ka Madhya Pradesh, hynrei ka la shah weng noh.
Haba phai sha ka jingïalehkai, lah ban ong ba ka kynhun ka la lah ban ïalehkai kham bha shuh shuh, bad sa shi sien pat u Chanjib Chetry u la lah ban tyngshaiñ bha ïalade da kaba khyrwit lai sien lynter ki hat-trick ha baroh lai sien ki jingïalehkai. Haduh mynta u la lah ban kynjoh 10 kol marwei. Katba u Namebanlam Nongkseh, Samuel Malieh, Mark R Marak, Iainehskhem Warjri bad u Iaisynroplang Syiemlieh ki la ïoh ban pynkhihjar mar kawei.
Kumban shu kdew, ka Nongjri Presbyterian Secondary School na Ri-Bhoi District ka la ïoh ban mihkhmat ïa ka jylla Meghalaya sha kane ka lympung U-15 boys hadien ba ka la rah ïa ka state-level Subroto Cup ha u bnai ba ladep.
Kum ka lahduh na ka Group-B ka Meghalaya kan jam mynta sha ka wat ïakhun knockout ha kaba kan pynkhreh ïa ka quarterfinal pyrshah ïa ka Army Boys Company la Sngi U Blei (25 tarik, Nailar) ha ka por 7 baje mynstep, ha ASC Centre.