Shillong, Jylliew, 20: Ki paid Khasi kiba shong basah ha Karbi Anglong, Assam, ka thaiñ khappud ba dang don hapdeng ka jingïapynbeit pud pynbeit bad ka Jylla Meghalaya da kawei ka jingmut ki la thaw ïa kawei ka kynhun kaba la tip kum ka United Khasi People Organization (UKPO).
Ïa ka UKPO la suit la shor ha ka jingkynduh lang jong ki jaidbynriew Khasi kiba sah ha Karbi Anglong District ha ka 18 tarik mynta u bnai hapoh ka jingïalam jong u Bah Pius Sten uba la pynïaid ïa ka jingïalang kaba la long ha Umlaper Block-II.
Ka jingthmu jong kane ka kynhun ka long ban peit ban khmih ïa ki jingeh ba ki Khasi ki ïakynduh nangne shakhmat bad ba kin ïoh ïa ka imsuk imsaiñ bad kiwei ki jaidbynriew ki bym dei ki Khasi ha katei ka thaiñ bad kumjuh ruh ka synjuk kan sa pyrkhat halor ka jingbym ïoh ki Khasi ban jied ïa ki dkhot sha ka Karbi Anglong Autonomous Council.
U Nongaibuit jong ka UKPO u Bah Niwel War u la ïathuh ba ka seng ka la kyrpad ïa ka KAAC kan ai jingithuh ïa ka kolshor ki Khasi kiba shong basah ha Karbi Anglong bad ban thung ruh uwei u dkhot hapoh ka Council napdeng ki Khasi kum u Nominated MDC.
Ki nongkitkam jong ka UKPO ki long u President Bah Pynshngaiñlang Ratane, u General Secretary Bah Kularskhem Khynriam bad ïa u Bah Niwel War bad ïa u Bah Pius Sten la jied kum ki Nongaibuit.
