Mairang, Naitung, 29: Ka ophis jong u Deputy Commissioner, Eastern West Khasi Hills District, ka la ïoh pdiang ïa ka shithi na ki bahaïing hasem bajan tam bad ka Phan Nonglait bad na u Acting Basan bad Assistant Secretary ka Dorbar Kur Lyngdoh Nonglait, ha kaba ki la kyrpad ba kum ka dak jong ka jingithuh bad jingñiew burom ïa ka jingïaleh jong kane ka riew shlur pyrshah ïa ki Phareng, ban pynbna noh ïa ka 6 tarik, Nohprah manla u snem, kaba dei ka sngi ïap jong ka Phan Nonglait kum ka sngi shuti ha baroh kawei ka District.
Halor kane, na ka liang u Deputy Commissioner jong ka Eastern West Khasi Hills District u Bah W.Nongsiej u la pynbna ba lada don kino kino ki bym sngew ïahap bad kane ka jingkyrpad lane lada don mano mano ba ai jingmut halor kane ka bynta, kin sngewbha ban pyntip sha ka ophis jong u Deputy Commissioner, Eastern West Khasi Hills District ha lane shwa ka 30 tarik, Nailar mynta u snem.
