Tyrwa ka HANM ïa ka HNLC ban kynthup ïa ka ILP, ktien Khasi bad khappud ha ka mat kren ïasuk

By Mawphor Editor On Sep 25, 2022

Shillong, Nailur 24: Ka Hynñiewtrep Achik National Movement ha ka sngi Saitjaiñ ka la tyrwa ïa ka HNLC ka seng kieng atiar kaba ka jingïakren ïasuk bad ka sorkar pdeng bad ka sorkar jylla ka dang ïaid ba kan kynthup lang ïa ka mat ILP, ka Ktien Khasi ban ïohrung ha ka Khyrnit ba phra ka riti synshar bad ka jingpynbeit pud kan dei lang ki mat kiba ka HNLC ka tyrwa kum ki kyndon ïakren ïasuk bad ka sorkar.
Haka jingïakren sha ki lad pathai khubor u President ka seng u Bah Lamphrang Kharbani u la ong ba ka ka HNLC kum ka seng kieng atiar ka jaidbynriew kaba ju kren ïa ka khia ka shon jong ka bad kaba la ïakhun ruh na bynta ka jaidbtynriew ba ka dei ban tyrwa lang ïa ka ILP kum kawei na ki mat ha ka kyndon ïakren ïasuk namar ka jaidbynriew ka la angnud la slem bah ban ïoh noh ïa kane ka stieh ban ïada na ka jingwan buhai shnong ki heh paid na sha kiwei pat ki bynta jong ka ri.
“Ka ILP ka la donkam palat ban pyntreikam noh ha ka jylla bad nga ïohi ba ka sorkar ruh ka la leh klet ïa kane ka mat namar kam ju don shuh ka jingleit buddien sha ka sorkar pdeng halor kane ka mat. Namarkata, nga kyrpad ïa ka HNLC ba kan buh ïa kane ka kyndon ha ka mat ïakren bad ngi sngewdei ruh ba ka sorkar jylla kan pdiang bad tyrwa ïa kane ka mat namar kan long ka stieh ïa ka jingwan rung buhai shnong kiba nabar ban tyllep ïa ki trai shnong jong ka jylla”, u la ong.
Shuh shuh haba ïadei bad ka jingdawa ban pynrung ïa ka ktien Khasi ha ka khyrnit ba phra ka riti synshar u bah Lamphrang u la ong ba kane ruh ka dei kawei na ki mat jingdawa kiba kum ka jaidbynriew ka kwah ba ïa ka ktien ban don ka jingithuh bad ka jingïada ruh da ka iñ ïoh kan shuh jah klep noh na ka sla pyrthei. U la ong ruh ba ka HNLC ka dei ban thep lang ïa kane ka mat ha ki kyndon ïakren ïasuk khnang ba kan long ka jingmyntoi ïa ka jaidbynriew.
Haba ïadei bad u pud u sam ka HANM ka ong ba kumba ka HNLC kaba la ai jingïada ïa ki dkhot ka jaidbynriew na ka jingthombor ki lehnoh ha ki thaiñ Khanduli “sngewdei ruh ban kyrpad ba kan buh ïa kane ka mat ha ka jingïakren ïasuk bad ka sorkar” u la ong.