Tyrkhong um ki wah ba jur palat ka jingkhat shyiap, thang rnga bad pom dieng pathar

Nongstoiñ, Ïaiong 13: Nalor ka jingpom dieng pathar, hynrei ka jingthang rnga bad khat shyiap na ki wah, ka la pynlong ïa ki wahduid bad wah bah ban nang rit nang rit kat nang mih ki snem ha West Khasi Hills District.
Ka wah Kynshi kawei na ki wah ba heh tam ha kane ka District, hynrei katba nang ïaid ka por la isynei ban peit namar ka la nang rit bad ring sdot haduh katta katta. Kane ka wah kaba ju shlei da ki rawon man ka por hynrei mynta lada leit sha ki shnat jong ka, la sakhi ba ki lad lad jong ka ki la tyrkhong bad harud jong ka pat, la dap da ki jaka pynlang shyiap. Kumjuh ruh jan man ki jaka ki khlaw kiba marjan bad ka, ki la syllen namar ka jingthang rnga.
Ka jingkhat shyiap ka la long sha ba palat bad ym don ba kheiñ snep ei ei ïa ki kyndon kaba ki bor sorkar ki la mana ha kaba ïa dei bad ka jingkhat shyiap shilynter kane ka wah. Kumba ka paw haduh mynta ki jingmana da ki bor jong ka aiñ ki shu long tang ki jingpynbna, katba ka kam pat kam poi shano shano, namar shilynter ka wah Kynshi haduh ki thaiñ Nongkhnum, ka jingkhat shyiap ka dang long beit kumjuh.
“Ka long kaba phylla ba ki don ki briew kiba pynksan ba lada pom dieng bad thang rnga, tang hadien katto katne snem, ki dieng ki la mih hi bad hapdeng lai bad saw snem kito ki jaka ba la syllen na ka thang rnga ki la kyllaw khlaw biang. Watla kita ki dieng ki mih biang ruh, hynrei ki tyllong um pat ki la nang rit bad katba kitei ki dieng ki nang heh ki um bad ki wah ki la rngad lut”, ong u Bah W.Ïawphniaw haba pynpaw ka jingsngewkhïa ïa ka jinglong jingman ki wahduid bad ki wah bah ha kane ka District.
U la ong ruh, “Ha u bnai Lber bad Ïaiong,ki paitbah jong kawei pa kawei ka shnong ki mad ym tang ïa ka jingkyrduh um, hynrei man la u snem ki don ki nongshong shnong kiba duh noh ïa ki ïing ki sem bad ki jingdon jingem, namar ka jingbam duh jong ki thylliej ding na ka jingthang pathar jong ki riew shim kabu ïa ki khlaw ki btap bad ki lum”.
“Nalor kata ha une u bnai ki um ha ki wah ki la rit haduh katta katta namar ki tyllong umpohliew ki la rngad lut. Hynrei kaba lyngngoh ka long ba haba ki bnai kyrduh um ki la poi, ki paitbah ki kynnoh bad tim ïa ka sorkar ba kam lah ban pynbiang umbam umdih. Ka jingkylli kaba mih ka long hato ka sorkar ka lah mo ban shna umï mano ba pynrngad khlem dei por ïa ki tyllong um”.
Ha kaba ïa dei bad ki tyllong um bam ha ki shnong ki thaw u la ong, “Haba phai ha ka jingrngad ki tyllong um bam ym lah ban len ïa ka jingshisha ba da ki phew snem, ki paitbah jong palat phew tylli ki shnong kiba hap ha Mawthadraishan Block bad Nongstoiñ Block, ki ïoh pahuh ka um bam na ki tyllong um kiba la ring na ki wahduid kiba mih na ki lynter lum Mawthadraishan. Hynrei naduh u snem 2022 ka jingpom pathar ïa ki khlaw ha shilynter jong utei u lum na ka bynta ban thang rnga ka jingkyrduh um ka la sdang. Lada ka jingpom pathar ïa ki khlaw ha shilynter jong utei u lum kan dang bteng baroh ki tyllong um kin sa rngad lut”.
“Ym lah ruh ban len ba ki don palat phew tylli ki pung kiba heh bha ha baroh shilynter jong ki kliar lum Mawthadraishan kata naduh ka shnong Domkseh, Mawphanlur, Mawkyrtung, Lawdisai bad kiwei kiwei ki shnong. Hynrei lada ki paitbah ki dang bteng ban pom pathar ïa ki khlaw, ha kawei ka sngi kitei ki pung ki lah ban don um tang ha ka por lyiur, hynrei ha ki aïom tlang kin kylla tyrkhong kum ki khyndew shrah bad dei hangta ba ki longïing ki hap ba thied wat ïa ka um sait paiñkhana ruh”.
Ha kaba ïa dei bad ka jingjur palat ka jingthang rnga ha ki khlaw bad ka jingkhat shyiap ha ki wah khamtam ha wah Kynshi, u bah W.Ïawphniaw u la ong, “Ka por imat ka la dei ban leh da kaba tyngeh da ki kyndon aiñ kiba ïa syriem ïa ka aiñ POCSO, lym kumta ka jinglong jingman jong ki wah naduh ki wahduid haduh ki wah bah katba dang ïaid ki sngi ki snem, la isynei ban peit. Wat ha ki bnai ba ther u ‘lap bah ruh, ka um kam lah shuh ban kot ha ki bynta ba kham shalor jong ki wah kumba long baroh shikatta. Hynrei kiba bun ki la rit haduh katta katta kat haduh ba imat ban leit tong doh ruh la jynjar ban ïoh”.