SHILLONG, Nailar 28: Ka Meghalaya Chess Association (M.C.A) ka dap da ka jingsngew sarong ban pynbna ba 2 ngut ki nongïalehkai ka Meghalaya ki la ïoh ban khur khusnam ha ka lympung ïalehkai Chess kaba la tip da ka “2nd Guwahati Smart City International Open FIDE Rating Chess Tournament 2025”.
Kine ki nongïalehkai kiba la wanrah nam ïa ka jylla ki long u Nikman G. Momin uba la wan ha ka kyrdan ba ar (Below- 14 years) bad Silkam A Sangma kaba la wan kyrdan ba san (Below-1850).
Kane ka 2nd Guwahati Smart City International Open FIDE Rating Chess Tournament 2025 la pynlong ha Guwahati bad la sdang ïa ka naduh ka 04 tarik haduh 08 tarik Nailar, 2025.
Ka M.C.A ka sngew sarong ruh ban pynbna ba 2 (Ar) ngut ki nongïalehkai shi kpa shi kun na Meghalaya (Father & Daughter Duo) ki la ïoh khusnam ha ka “1st Andaman & Nicobar International Open FIDE Rated Chess Tournament 2025” kaba la long ha Port Blair naduh ka 23 tarik – 28 tarik Nailar.
Kine ki shi kpa shi khun ki la jop kyrdan ba nyngkong (1st position) kidei kiba la tip kyrteng da u Silseng N.Marak (Hapoh – 1700) bad ka Cheaha Nikgame G. Momin (Female – Under -13 years).
Kumta na ka liang jong ka M.C.A ka kitbok kitrwiang ïa ki ba kin nang ïai kiew shaphrang ha ka jingïalehkai Chess jong ki.
Kane ka long katkum ka kyrwoh na u Publicity Secretary jong ka Meghalaya Chess Association halor ka jingjop bad ka jingwan rah nam jong kitei ki saw ngut ki nongïalehkai ha ki jingïakop ba ki la ïa shim bynta.
