Nongpoh, Lber, 09: Ha kawei ka jingjia aksiden kaba shyrkhei, u nongñiah kawei ka thuk thuk u la khlad noh syndon hashen katba uwei pat u paralok ba shong hadien u la mynsaw jur hadien ba ki la leit ban tynrah nadien jong kawei ka trok kaba dang ïeng ha surok bah NH 6 ha ka shnong Erpakon.
Katkum ka jingtip bala ïoh lum la ong ba kane ka jingjia ka la jia ha ka miet sngi Saitjaiñ, ha ka por 7 baje eiei ha kaba katei ka thuk thuk bala kaba don ïa u number ML 10 D 1040 bala ñiah da u samla Finewel Taro (24) na ka shnong Rongmesek ryngkat bad uwei u paralok ba shong hadien bala tip kyrteng kum u Lucas Taro (37) na ka juh ka shnong ki dang hiar sha ka thaiñ Nongpoh, hynrei ynda poi ha ka shnong Erpakon u nongñiah katei ka thuk thuk u la leit ban tynrah nadien jong katei ka trok kaba don ïa u number ML 04 D 4271 kaba dang ïeng ban bujli taiar, haduh ba u samla Finewel Taro u ba ñiah ïa katei ka thuk thuk u la khlad syndon na kane ka sla pyrthei, katba utei uba shong hadien u la mynsaw jur.
La ong ruh ba katei ka jingjia ka la jia namar ka jingpynher sted palat ïa ka thuk thuk ha kaba u nongñiah um lah shuh ban tehlakam haduh ba u leit ban tynrah syndon hadien ka trok kaba dang ïeng, khlem da pyndonkam ruh ïa ka helmet, watla ki bor pulit ka Ri-Bhoi ki ju ai jinghikai sha ki paidbah ban phong ïa ka helmet haba ñiah ïa ki ar sha ka.
Ki pulit ka Nongpoh Traffic Police tang hadien katei ka jingjia ki la poi mar mar sha katei ka jaka bad pynkit noh ïa utei u nongñiah sha Nongpoh Civil Hospital hynrei ki doctor ki la pynbna ba u la khlad noh, katba ïa utei uba mynsaw la pynkit noh sha Bethany Hospital ban ïoh ka jingsumar bad ka jingtohkit halor katei ka jingjia ka dang ïaid shakhmat.
