SHILLONG, Naitung 27: Ka Badminton Promotional Group Shillong ha ka sngi Saitjaiñ ka la ïoh ban pynhap pyrda noh ïa ka lympung ïalehkai Badminton kaba la tip da ka 1st Badminton Promotional Tournament, 2025 ha JN Sports Complex, Polo.
Kane ka lympung kaba lai sngi lynter ka la sdang naduh ka 24 tarik Naitung haduh 26 tarik Naitung, 2025, ka la sakhi ïa ka jingïashim bynta jong 273 ngut ki nongïalehkai (Shynrang bad Kynthei) na ki District bapher bapher, bad ka la sakhi ruh ïa ka rukom ïalehkai kaba ithiang bad kaba pynshohbiej jong u samla Alpon Nongrum.
U samla Alpon Nongrum u dei u samla uba kyrpang namar u dei u nongïalehkai uba don jingduna ha ki dkhot met, kata ha ka liang ka kti kadiang. Pynban ka jingduna kam shym la khanglad ne long mawjynthut ïa une u samla ha ka jingïaid lynti jong u ha ka jingïalehkai Badminton.
U samla Alpon Nongrum u la ong ba kane kam dei ka sien kaba nyngkong ba u mih madan ha ki rynsan ïalehkai, hynrei u la ïashim bynta ruh ha ka State Championship kiba la long ha Nongstoiñ bad kiwei ki championship ha ki snem ba la dep.
U Alpon Nongrum u dei u para athlete ne u riewialeh sport uba don jingduna ha ki dkhot met. Une u samla u lah ruh ban ïakhun ha ka Paralympic bad u long u khlur ïalehkai badminton uba tbit bad u lah ban wanrah khusnam.
Ka jingthmu jong ka BPG Shillong da kaba pynlong ïa kane ka lympung ka long ban ai ïa ka rynsan na ka bynta ki nongïalehkai ka Jylla Meghalaya ban pynkhreh bad pynjanai ïalade na ka bynta ka State level championships bad kumjuh ruh ïa ka national levels.
Ha kajuh ka thmu ban pynroi ïa ki sap ïalehkai badminton bad pynshlur ïa ki paid nongshong shnong ka Jylla ban im ïa ka jingim kaba koit kaba khiah da kaba shim bynta ha ki jingïalehkai bapher bapher.
