Tyngshaiñ u Mewankitbok ha ka jingjop da 3 wiket jong ka M’laya ïa ka Nagaland ha ka NECDC U-19 Men’s Tournament

Shillong, ïaïong 08: Ka kynhun ïalehkai kriket jong ka Meghalaya ki la buh shadien ïa ka jingshah rem ha ka jingïalehkai ba nyngkong da kaba wanphai ryngkat ka jingjop da 3-wiket pyrshah ïa ka Nagaland ha ka Group A jong ka lympung NECDC U-19 Men’s One Day Tournament ha Sovima hynne ka sngi Balang.
Ka Meghalaya kaba la mad ïa ka nam rem ha ka Manipur da 144 ron hynnin ka sngi Ba-ar, ka la jied ban bol nyngkong hadien ba jop ïa ka jingkynting pisa (toss).
U Mewankitbok Kharpuri u la long u namtam ha ka boling na ka bynta ka kynhun, ha kaba une u nongkawang bol leg-spinner u la lah ban khur marwei haduh 5/33 ha ki 10 ober. Kiwei pat ki nongïalehkai kiba la noh synñiang ban pynhap wiket ki long u Benedict Jones Makdoh (2/31 ha ki 8 ober), u Gaurav Narleng (1/2 ha ka 0.5) bad u Apandanka Marak (1/25 ha ki 7 ober) ha kaba ka Nagaland ka la pynkut ïa ka tied na ka bynta 167 ron ha ki 39.5 ober.
Na ka bynta ka Nagaland, baroh ar ngut u Shyerinlo bad u Amongti Longkumer ki la ïoh ban kamai 36 ron.
Ka jingpyrshang ban beh ïa ka thong kam shym la long kaba ïaid beit ïaid ryntih na ka bynta ka Meghalaya, ha kaba ka la duh 3 wiket ha ka por ba ka dang kamai tang 22 ron shuwa ba u Mewankitbok un ïoh ka jingkyrshan na u Angkit Tamang. Ryngkat lang ki la lah ban kyntiew 49 ron na ka bynta u wiket uba saw shuwa ba u Mewan un shah pynhap noh na ka bynta 34 ron na ki 44 tylli ki bol (4x4s, 2x6s).
Nangta u Angkit u la shah pynkhyllem noh hadien kumba 10 ober na ka bynta 42 ron (67 bol, 4x4s) katba ka Meghalaya ka la pynjan ïalade sha ka thong. Watla katta ruh, ka Nagaland ka dang don ka jingkyrmen ban wanphai biang hynrei u Rudra Singh Rathore (34 khlem shah pynhap na ki 27 bol, 4x4s, 1×6) u la pynthikna ban don bynta ban kamai ïa ki ron kiba dang sah na ka bynta ka Meghalaya, kaba la kynjoh 170/7 ha ki 29.4 ober.
Na ka bynta ka jingïalehkai ba kyrpang ha ka boling bad tied, u Mewan u la shah jied kum u Player of the Match.