Tyngshaiñ ki nongïakhun kti ka jylla ha ka IX Asian Armwrestling & VIII Para Armwrestling Cup 2025

SHILLONG, Nohprah 08: Da ka jingsngew sarong ka jylla Meghalaya ka la pynpaw ïa ka jinglah jong ka ban ïa aireng ha ki rynsan ïakop bar ri (International stage) da kaba khur 8 tylli ki takma ha ka ‘IX Asian Armwrestling & VIII Para Armwrestling Cup 2025’ kaba la long ha Ajman, UAE.
Kine ki takma ba kynthup ïa 4 tylli ki takma ksiar bad 4 tylli ki rupa la khur da saw ngut ki nongïakhun-kti na ka Meghalaya Arm Wrestling Association, kata u Shanborlang Siangshai, ka Angel Mary Mylliem Umlong Khunsyiem, ka Mihsngewbha Rymbai bad ka Starina Jasain.
Da kaba mihkhmat ïa ka jylla bad ïa ka ri India baroh kawei, kine ki saw ngut ki la leit ban ïakhun ryngkat ka mynsiem kaba shlur bad da kaba kut jingmut, kaba la pynlong ïa ki ban wanphai biang sha la ïing ryngkat bad ka jingjop.
U Shanborlang Siangshai, u ba na Khanduli, West Jaintia Hills District, u la shim bynta ha ka Para HI – Hearing Impairment, Standing Men 70 kg, u la khur 2 tylli ki takma rupa, ka kong Angel Mary Mylliem Umlong Khunsyiem na Umlyngka, Upper Shillong-EKHD, ka la shim bynta ha ka Master Women 70 kg bad khur ar tylli ki takma ksiar.
Ka kong Mihsngewbha Rymbai na Kdonghulu, Bhoirymbong, Ri Bhoi District, ka la khur mar kawei ka takma ksiar bad rupa ha ka Grandmaster Women Open, kumjuh ka kong Starina Jasain na Nongmynsong, Shillong-EKHD, ka la khur kawei ka takma ksiar bad kawei ka rupa ha ka Grandmaster Women Open.
Halor kane ka jingjop, na ka liang jong u President ka MAWA-Bah Junestar Kharbuli u la ong, “Ki jingjop ba khraw jong ki kim shym la wanrah burom tang ïa ka synjuk hynrei ki la buh dak ruh ïa ka jingnang khlaiñbor jong ka Meghalaya ha kane ka jingïalehkai ïakhun kti ha ki rynsan ïakop ka dewbah Asia”.
“Kine ki takma ba ki la ïoh khur ka ïeng kum ka jingpynshisha ïa ka jingtrei shitom jong ki nongïalehkai, ka jinglong ryntih, bad ka jinglen lade. Ka Meghalaya Arm Wrestling Association ka ai khublei kyrpang ïa baroh saw ngut na ka bynta ka jinglehkai ba phylla jong ki bad na ka bynta ka burom ba ki la wanrah ïa ka jylla bad ïa ka ri baroh kawei,” la bynrap u Bah Junestar.