Shillong, Jylliew, 10: Ka St. Paul’s Higher Secondary School, Marbisu ha ka sien ba nyngkong eh, ka la long ka skul ban poi ha ka kyrdan kaba hakhmat eh ka resol jong ka eksamin Secondary School Leaving Certificate (HSSLC) ba la pynbna da ka Meghalaya Board of School Education (MBoSE) ha ka sngi Thohdieng.
Ha ka Top Ten jong ka SSLC, ka samla Amebaaihunsha Kharbhih jong ka St Paul’s Higher Secondary School, Marbisu bad u Arghadeep Saha, uba dei na ka skul Privte ki la rung ha ka kyrdan First Position.
Ka jingpas jong ki khynnah skul kiba ïakhun ïa kane ka eksamin mynta u snem 2022 ka long 56.96 percent haba nujor bad u snem ba ladep kaba long 52.91 percent.
Baroh arngut, ka Amebaaihunsha bad u Arghadeep ki la ïoh mar 575 mark. Ka Amebaaihunsha ka la ïoh distinction ha ka sobjek English, Mathematics, Science and technology, Social Science, Health and Physical Education, Khasi katba u Arghadeep u la ïoh Letter Marks ha ka sobjek English, Mathematics, Science and technology, Social Science, Health and Physical Education bad Alternate English.
Ha ka kyrdan kaba ar, mynta u snem la shem ba ki don arngut kiba la ïoh rung kiba kynthup ïa u Samla Menangmankhraw Kharkongor na ka St Anthony’s Higher Secondary School, Shillong bad ka Samla Rilaakor Lamare na ka Auxilium Girls’ Higher secondary School, Shillong kiba la ïoh khur mar 569 marks.
Ki don san ngut ki khynnah skul na ki skul ki bym pat pynïasoh bad ka MBoSE kiba la ïoh rung ha ka Top 20 mynta u snem.
Kan long ruh ka sien kaba nyngkong eh ïa ka Holy Angles Secondary School, Bhoirymbong, Ribhoi District ban ïoh rung ha ka kyrdan kaba Phra ha ka thup Top 20 lyngba ka samla Lañiewkyrpang Nongrum, kaba la ïoh ïoh distinction ha ka sobjek English, Mathematics, Science and technology, Social Science, Health and Physical Education bad Khasi.
U Arghadeep Ghosh jong ka Sherwood School, Tura u la poi ha ka kyrdan kaba lai da kaba ïoh khur 568 marks.
Ki don haduh 42 ngut ki khynnah kiba la ïoh rung ha ka Top 20 bad 14 ngut ha ka Top 10.
Ka jingpas bha jong ki khynnah ha ki District bapher bapher ki long: East Khasi Hills – 75.05%, West Khasi Hills – 65.34%, Eastern West Khasi Hills–71.50%, South West Khasi Hills–64.10%, Ri-Bhoi–63.60%, West Jaiñtia Hills–77.51%, East Jaiñtia Hills–82.36%, East Garo Hills–39.31%, West Garo Hills–41.10%, South Garo Hills–31.63%, North Garo Hills–36.33% bad ka South West Garo Hills–26.45%.
Haduh 32,678 ngut na ki 57,371 ngut ki khynnah skul na ki 644 tylli ki skul ki la pas ha ka eksamin SSLC kaba la long ha ki 152 tylli ki Centre.
Ka East Jaiñtia Hills District ka dei kaba bun tam ki khynnah skul kiba pas kaba long 82.36 percent katba ka South West Garo Hills ka dei kaba duna tam kaba long tang 26.45 percent ha ka eksamin SSLC.
Ha ka resol jong ka eksamin Higher Secondary School Leaving Certificate (HSSLC) ka Don Bosco College, Tura (Higher Secondary Section), ka la ïoh knieh ïa ka kyrdan kaba nyngkong ha kaba u Ramyank Nilabh Chakraborty u la ïoh 460 marks. Katba ka samla Bahunlang Mawrie jong ka Auxilium Girls’ Higher Secondary School, Shillong bad u Vijay Adhikari na St Anthony’s Higher Secondary School, Shillong ki la poi ha ka kyrdan kaba ar bad balai da kaba ïoh khur mar 450 marks bad 436 marks.
Ka jingpas jong ki khynnah skul ha ka eksamin HSSLC mynta u snem ka long 81.17 percent.
Haduh 18,434 ngut na ki 22,711 ngut ki khynnah skul na ki 243 tylli ki skul ki la pas ha ka eksamin HSSLC kaba la long ha ki 104 tylli ki Centre.
Ha kane ka eksamin, ka South West Khasi Hills District ka dei kaba bun tam ki khynnah skul kiba pas kaba long 91.94 percent katba ka South Garo Hills ka dei kaba duna tam kaba long tang 55.67 percent.
