Twad jingmut ka sorkar na ki riewstad aiñ halor ka jingthmu pynrung ïa ka ILP ha ka Immigration and Foreigners Act 2025

Shillong, Kyllalyngkot 27 : U Symbud Myntri Rangbah ba khmih ïa ki kam pohïing u Bah Prestone Tynsong ha ka sngi Ba-ar, ula ïathuh ba ka Sorkar ka dang bishar bad twad jingmut na ki riew stad aiñ halor ka jingthmu ban tynsad ïa ki kyndon kiba ïasyriem kum ka Inner Line Permit (ILP) ha ka aiñ ba thymmai ka Immigration and Foreigners Act 2025.
“U Myntri Rangbah ula dep ban ai jingkren halor kane bad ngi dang bishar bad twad jingmut na ki riew said aiñ la ngi lah ban em ban pynrung ha ka Immigration and Foreigners Act 2025 ba thymmai ïa ki kynja kyndon hangtei ban lah pyntreikam ïa ka kum ka ILP” ong u Bah Prestone.
Ula bynrap “Hynrei ïa kane ruh ngi hap phai sha ki kyndon ba bniah ha ka Immigration and Foreigners Act, 2025 bala mynjur da ka Parliament, ka ban sa khmih bniah da u Advocate General bad ka kynhun ki stad aiñ”.
U Bah Prestone ula kyntait ïa ka jingkynnoh ba ka Sorkar Jylla kala iehnoh shadien ïa ka Meghalaya Residents Safety and Security Act, 2016 (MRSSA).
“Mano ba ïathuh ïaphi ba ngi la iehnoh shadien ïa ka MRSSA 2026 ?. Katto katne ki bynta jong ka MRSSA la pyntreikam mynta. Ngi la treikam hapoh ka MRSSA” ula ong haba bynrap “Ngi la don ïa ki District Task Force (DTF) ba khlieh da ki Deputy Commissioner. Ngi la pyntreikam ruh ïa ki kat kum ka Rules. Ngan ïathuh ha phi kawei, ka MRSSA kala treikam pura”.
Haba ïakren bad ka Amendment Bill jong ka MRSSA, u Bah Prestone ula batai ba ka Original Act lane kata ka ‘Ain Rew’ kam don satia ïa ki kyndon ban pynïeng ïa ki entry-exit point,na kata ka daw ïa ka amendment bill lah phah sha ka Ministry of Home Affairs.
“Ngi la pyntreikam ïa ka MRSSA, hynrei lada pynshong aiñ, ngim lah ban pynïeng ïa ki entry-exit point namar kam don satia ha ka kyndon ha ka MRSSA” ula ong.